Nav bar

Jumamosi, 15 Januari 2022

ULEGA: SERIKALI YAJA NA SULUHISHO KUKABILIANA NA UKAME, VIFO VYA MIFUGO NCHINI

Serikali imekuja na suluhisho katika kukabiliana na changamoto za ukame uliosababisha vifo vingi vya mifugo kwa kutumia Sh bilioni 130 ili kuchimba visima, kukarabati na kujenga mabwawa ikianza na maeneo yaliyoathirika zaidi.

Naibu Waziri wa Mifugo na Uvuvi, Mhe.Abdallah Ulega alieleza mkakati huo wa Serikali Januari 14,2022 wakati alipofanya ziara Wilaya ya Kiteto,Mkoani Manyara ili kuwapa pole kwa kufiwa na ng'ombe 1,874 kati ya Septemba 2020 hadi Januari mwaka huu.

"Serikali ya Mama Samia ni sikivu na inawajali wananchi wake, imenituma kuja kuwapa pole kwa kufiwa na ng'ombe wengi waliokufa kutokana na ukame kutokana na kukosa maji na malisho" alisema.

Aidha Mhe. Ulega baada ya kushuhudia mizoga ya ng'ombe katika kijiji cha Makame kata ya Makame akiwa katika mikutano ya hadhara kwenye kijiji cha Makame na Ndede alisema, Serikali inawapa Pole lakini imekuja na suluhisho la kukabiliana na ukame huo kwa kuchimba visima na mabwawa kwa ajili ya kunywesha mifugo.

Katika kuhakikisha wafugaji wanaondokana na vifo vingi vya mifugo na wanakabiliana na uhaba wa mifugo, Serikali itasambaza nyasi za malisho kwa  mifugo kwa ajili ya wafugaji kuzipanda, kuvuna na kuhifadhi ili kuzitumia wakati wa ukame na msimu kama huu.

Katika kukabiliana na ukame huo, pia aliwataka wafugaji Kiteto na Tanzania kwa ujumla, kuacha kufuga mifugo kwa mazoea, wanatakiwa kuanza kupunguza mifugo yao kwa kuuza ili kujenga nyumba bora, kusomesha watoto na kuboresha mifugo inayobaki na kuuza sokoni ikiwa bora.

Mhe.Ulega alisema, wafugaji wanatakiwa kuitikia wito wa Serikali wa kuweka hereni kwenye masikio ya ng'ombe kwa lengo la kuweka alama ili badae kuzikatia bima ili zikifa waweze kulipwa na pia wakopesheke na taasisi za kifedha kuliko ilivyo sasa.

Naye Mbunge wa Kiteto, Edward Ole Lekaite (CCM) alimshukuru Rais Samia Suluhu Hassan kwa kutenga Shilingi bilioni 130 kwa Wizara ya Maji kwa ajili ya kununua mtambo mmoja wa kuchimba visima, mabwawa na malambo katika mikoa yote nchini na akaomba mitambo ikifika mkoani kwake kutokana na sababu ya ukame apewe kipaumbele.

Mhe. Lekaite alisema kutokana na changamoto ya ukame Wilaya yake ambayo imeua mifugo mingi inaomba mtambo wa kuchimba mabawa ukifika mkoani basi Wilaya yake iwe ya kwanza kupewa.

Akizungumzia vifo vya mifugo, Mwakilishi wa Mkurugenzi wa Huduma za Afya kutoka Wizara ya Mifugona Uvuvi, Dk Vayan Laizer alisema vifo hivyo vinatokea sababu ya uhaba wa maji hivyo ng'ombe wanapokula majani mwituni na kukosa maji miili yao inakuwa na kinga kidogo na hivyo wanashindwa kujikinga na maradhi kutokana na sumu kubaki mwilini.

Naye Kaimu Mkurugenzi Sekta ya Afya Wilaya ya Kiteto, Dk Lunonu Sigalla wakati akitoa taarifa ya athari za ukame wilayani humo alisema kati ya Septemba mwaka jana hadi Januari mwaka huu ngombe 1874 kutokana na ukame na waliobaki wamedhoofu sana kutokana na changamoto hiyo.

Mkuu wa Wilaya ya Kiteto,Bw. Mbaraka Batenga alisema uboreshaji wa miundombinu ya mifugo unatakiwa kwa lengo la kufungamanisha na miradi ya ujenzi wa shule sikizi zaidi ya 47 zilizojengwa katika wilaya hiyo na hivyo kuzuia kuhama hama wafugaji hao.


Naibu Waziri wa Mifugo na Uvuvi Mhe. Abdallah Ulega akiangalia mfugo aliyekufa kwa athari ya ukame kwenye kata ya Makame Wilaya ya Kiteto Mkoani Manyara, akiambatana na Mbunge wa Kiteto Mhe. Edward Lekaita(wa kwanza kutoka kushoto),  Mkuu wa Wilaya ya Kiteto Bw. Mbarak Batenga, (wa pili kutoka kushoto), viongozi wa chama, wafugaji na watendaji kutoka Wizara ya Mifugo na Uvuvi. Januari 14,2022 

 

Naibu Waziri wa Mifugo na Uvuvi Mhe. Abdallah Ulega akiongea na watendaji wa Wilaya ya Kiteto mara baada ya kuwasili Wilayani humo kuona athari ya ukame kwa wafugaji, kukusanya mawazo ya pamoja ya kukabiliana na changamoto hizo Januari 14, 2022. Kulia ni Mbuge wa Kiteto Bw. Edward Ole Lekaita na kushoto ni Mkuu wa Wilaya ya Kiteto Bw. Mbarak Batenga. 


Alhamisi, 13 Januari 2022

WIZARA YAHIMIZA USHIRIKI WA WAZEE WA KIMILA KATIKA ZOEZI LA UTAMBUZI WA MIFUGO KIELEKTRONIKI

Mkurugenzi Msaidizi Huduma za Ukaguzi na Ustawi wa Wanyama kutoka Wizara ya Mifugo na Uvuvi,  Dkt. Annette Kitambi amewaomba Viongozi wa Vyama vya Wafugaji nchini kufikisha elimu ya utambizi wa mifugo kwa njia ya hereni za kielektroniki kwa wazee wa kimila ili kusaidia kufanikisha zoezi hilo bila vikwazo.

Dkt. Kitambi alitoa rai hiyo  wakati wa kufungua mafunzo ya siku moja ya utambuzi wa mifugo kwa kutumia hereni za kielekroniki jijini Dodoma Disemba 24,2021.

Alisema katika jamii za wafugaji hasa wamasai wazee wa kimila ndio wenye nguvu na kusikilizwa na vijana na watu wao wanaowaongoza hivyo endapo elimu hiyo itawafikia itasaidia wafugaji hao kutambua mifugo yao kirahisi.

"Chama cha Wafugaji tunawategemea sana kufikisha elimu kwa wafugaji lakini msiwasahau wale wazee maarufu na wazee wa mila kwa sababu akishaelewa akiwaambia watu wa jamii yake wanatekeleza kwa kuwa wanaheshimika", alisema

Aliongeza kuwa pamoja na mambo mengine Wizara ya Mifugo imeweka milango wazi kwa wafugaji kutoa maoni yao juu ya zoezi hilo la utambuzi kwa njia ya kielektroniki hasa wanapo baini kuwepo kwa mapungufu wakati wa utekelezaji wa zoezi hilo.

Katibu Tawala Mkoa wa Dodoma, Dkt. Fatuma Mganga  aliwatoa hofu wafugaji juu ya utekelezaji wa zoezi hilo kwa kuwa limelenga kuweka miundo mbinu bora ya ufugaji hasa swala la malisho.

Alisema changamoto ya malisho imekuwa ikiwasumbua wafugaji wengi na kujikuta wakihama sehemu moja kwenda nyingine kwa sababu Serikali ilikuwa ikikwamishwa na takwimu zisizo sahihi ambazo zilikuwa zikitolewa awali kulinganisha na uhalisia wa mifugo iliyopo.

"Nataka niwahakikishie wafugaji mara baada ya zoezi hili changamoto ya malisho itaenda kutatuliwa kwa sababu Serikali itakuwa na takwimu sahihi ya mifugo kila sehemu ya nchi kwa hiyo hata migogoro isiyo ya lazima haitakuwepo" alisema

Naye Katibu Tawala Msaidizi Sekta ya Uchumi Ofisi ya Mkuu wa Mkoa Dodoma, Aziza Mumba  alisema kuwa kukamilika kwa zoezi hilo kutakuwa kumesaidia nchi kuendana na matakwa  ya kidunia ya kutaka mazao yote ya mifugo yatokane na mifugo ambayo imesajiliwa kwa njia ya kielektroniki.


Katibu Tawala Mkoa wa Dodoma, Dkt. Fatuma Mganga akisoma hotuba wakati wa ufunguzi wa mkutano wa uhamasishaji wa zoezi la utambuzi, usajili na ufuatiliaji wa Mifugo kwa njia ya hereni za kielektroniki Mkoani Dodoma. Disemba 24,2021. 

Mkurugenzi Msaidizi Huduma za Ukaguzi na Ustawi wa Wanyama Dkt. Annette Kitambi akieleza lengo na faida ya zoezi la utambuzi, usajili na ufuatiliaji wa Mifugo kwa njia ya hereni za kielektroniki kwa maafisa Mifugo na maafisa TEHAMA (hawapo pichani) wa Wilaya na Mkoa wa Dodoma, Disemba 24,2021 

 


Afisa kutoka Kitengo cha Teknolojia ya Habari na Mawasiliano (TEHAMA)  Neema Kelya  akionyesha namna ya kutumia Mfumo wa usajili kwa maafisa Mifugo na maafisa TEHAMA wa Wilaya na Mkoa wa Dodoma  wakati wa kikao cha uhamasishaji wa utambuzi, usajili na ufuatiliaji wa Mifugo kwa njia ya kielektroniki , Disemba 24,2021 

WALIOVAMIA KARANTINI YA MIFUGO WATAKIWA KUONDOKA KWA HIYARI*

Na Mbaraka Kambona, Pwani

Waziri wa Mifugo na Uvuvi, Mhe. Mashimba Ndaki amewataka Wananchi wakiwemo Wafugaji waliovamia eneo la kuhifadhia na kuiangalia kwa muda Mifugo  inayosafirishwa kwenda nje ya nchi kuondoka katika eneo hilo kwa hiyari huku akionya kuwa atakayekaidi Serikali itatumia nguvu kuwaondoa.

Waziri Ndaki alitoa wito huo alipotembelea eneo la Karantini ya Kwala iliyopo katika Wilaya ya Chalinze, Mkoani Pwani Disemba 23, 2021. 

Alisema kuwa eneo hilo lina maslahi mapana kitaifa na hivyo wananchi kuvamia na kufanya shughuli zao katika eneo hilo linafanya karantini hiyo kupoteza sifa ya kibiashara kimataifa.

"Hili eneo lina  maslahi ya kitaifa hivyo wananchi walioingia na kukaa huku bila utaratibu wowote tuwaambie waondoke kwa hiyari, wale tutakaowakuta wakati tutakapoanza kazi ya ujenzi wa Karantini ya kisasa basi tutatumia nguvu kuwaondoa", alisema Mhe. Ndaki

Aidha, alisema kuwa mwaka wa fedha ujao watatenga fedha kwa ajili ya kuanza kujenga Karantini hiyo ili iwe ya kisasa itakayokidhi matakwa ya biashara ya kimataifa ya kusafirisha wanyama hai kwenda nje ya nchi.

"Hatuwezi kwenda kimataifa bila ya  kuwa na kituo hiki, wenzetu wakija hapa ghafla na hali hii watatuambia msiuze Ng'ombe wala Nyama zenu kwa sababu hakuna mahali watakuwa wamehakikishiwa usalama wao", alifafanua

Awali, Mkuu wa Kituo hicho cha Kwala, Dkt. Othman Makusa alimueleza Waziri Ndaki kuwa kituo hicho kina miundombinu duni na kimevamiwa na Wananchi kutoka Vijiji vya jirani na wanafanya shughuli zao mbalimbali ikiwemo Kilimo, Makazi na Ufugaji jambo ambalo linasababisha kituo hicho kupoteza sifa za kimataifa za kuwa Karantini.

Katika hatua nyingine, Waziri Ndaki alisema kuwa Wizara ya Mifugo na Uvuvi kwa kushirikiana na Wizara ya Nyumba na Maendeleo ya Makazi watakwenda kuliainisha eneo hilo vizuri na kuna baadhi ya maeneo ambayo wananchi wataambiwa wahame na maeneo mengine yatabakishwa kwa wananchi ili waendelee na shughuli zao.

 

Waziri wa Mifugo na Uvuvi, Mhe. Mashimba Ndaki (kulia) akipatiwa maelezo mafupi kuhusu Karantini ya Kwala na Mkuu wa Kituo cha Karantini hiyo, Dkt. Othman Makusa (kushoto) alipotembelea kuona na kukagua eneo lililotengwa kwa ajili ya kujenga Karantini mpya lililopo Mkoani Pwani Disemba 23, 2021. 

Waziri wa Mifugo na Uvuvi, Mhe. Mashimba Ndaki (kulia) akikagua eneo ambalo limetengwa kwa ajili ya kujenga Karantini mpya ya Kwala alipotembelea eneo hilo lililopo katika Wilaya ya Chalinze, Mkoani Pwani Disemba 23, 2021. Akiwa katika eneo hilo alisema kuwa wananchi wote waliovamia eneo hilo waondoke kwa hiyari vinginevyo shughuli za ujenzi zitakapoanza wataondolewa kwa nguvu. 

 


UZINDUZI WA MWONGOZO WA UPATIKANAJI, USIMAMIZI NA UENDELEZAJI WA MAENEO YA MALISHO.

Waziri ya Mifugo na Uvuvi, Mhe. Mashimba Ndaki akikata utepe kuashiria uzinduzi wa Mwongozo wa Upatikanaji, Usimamizi na Uendelezaji wa Maeneo ya Malisho katika hafla fupi ya kuzindua mwongozo huo iliyofanyika Mkoani Pwani Disemba 22, 2021. Wakati akizindua Mwongozo huo, Mhe. Ndaki alisema mwongozo huo ukitekelezwa vizuri utatatua changamoto ya malisho na maji kwa mifugo na itasaidia kupunguza migogoro ya Wafugaji na watumiaji wengine wa ardhi. 


Naibu Waziri wa Mifugo na Uvuvi, Mhe. Abdallah Ulega (katikati) akimkabidhi Waziri wa Mifugo na Uvuvi, Mhe. Mashimba Ndaki (wa pili kushoto) nakala ya mwongozo ili awagawie baadhi ya Wakuu wa Mikoa waliohudhuria hafla ya uzinduzi wa Mwongozo wa Upatikanaji, Usimamizi na Uendelezaji wa Maeneo ya Malisho iliyofanyika Mkoani Pwani Disemba 22, 2021. 

 
Waziri wa Mifugo na Uvuvi, Mhe. Mashimba Ndaki (wa pili kushoto) akimkabidhi Mwenyekiti wa Chama cha Wafugaji Tanzania (CCWT), Bw. Jeremiah Wambura nakala ya Mwongozo wa Upatikanaji, Usimamizi na Uendelezaji wa Maeneo ya Malisho katika hafla fupi ya kuzindua Mwongozo huo iliyofanyika Mkoani Pwani Disemba 22, 2021


Waziri wa Mifugo na Uvuvi, Mhe. Mashimba Ndaki (kushoto) akimkabidhi Mkuu wa Mkoa wa Pwani, Mhe. Abubakar Kunenge nakala ya Mwongozo wa Upatikanaji, Usimamizi na Uendelezaji wa Maeneo ya Malisho katika hafla fupi ya kuzindua mwongozo huo iliyofanyika Mkoani Pwani Disemba 22, 2021. 

 

 

WATAKAOSHINDWA KUSAJILI MIFUGO KWA HIYARI KUCHUKULIWA HATUA ZA KISHERIA.

Serikali imesema itawachukulia hatua wafugaji watakaoshindwa kusajili mifugo yao kwa njia ya utambuzi wa hereni za kielekroniki pindi zoezi hilo litakapofungwa agosti 2022.

Hayo yamebainishwa na Mkurugenzi Msaidizi Huduma za Ukaguzi na Ustawi wa Wanyama, Dkt. Annette Kitambi wakati wa utoaji mafunzo ya utambuzi wa mifugo kwa kutumia hereni za kielekroniki Disemba 21,2021 Mkoani Morogoro.

Alisema kwa sasa zoezi hilo linaendelea kwa utoaji elimu kwa wataalam na viongozi kutoka Serikali za mitaa ngazi ya mkoa na wilaya pamoja na wafugaji ambao kwa pamoja watahusika katika kutekeleza zoezi hilo linalotarajiwa kuanza mapema Januari mwakani.

"Sheria zipo lakini kwa sasa hivi tunafanya kwa kuwahamasisha na kuwaelimisha, zoezi hili litaenda mpaka agosti mwakani tutakuwa tumemaliza kwa hiyari ndipo sheria zitaanza kutumika na sheria imeweka wazi kwamba ikibainika haijatambulika utapigwa faini ya shilingi milioni 2 au kwenda jela miezi sita au vyote kwa pamoja" alisema

Akisoma hotuba kwa niaba ya mgeni rasmi katika ufunguzi wa mafunzo hayo Kaimu Katibu Tawala Mkoa wa Morogoro Mhandisi Ezron Kilamhama akawataka wakuu wa Wilaya na wakurugenzi wa halmashauri zote mkoani humo kuhakikisha wanasimamia ipasavyo zoezi la utambuzi wa mifugo kwa kutumia hereni za kielekroniki.

Alisema zoezi hilo linaloenda na utoaji elimu kwa watendaji wa serikali ngazi ya halmashauri ni vyema kwa wataalam kila mmoja akaelewa vizuri muongozo, sheria na kanuni ili aweze kwenda kutoa elimu kwa wafugaji na wataalam waliopo ngazi za chini.

"Niwaagize wakuu wa wilaya na wakurugenzi kuhakikisha elimu hii inayotolewa inawafikia wafugaji na kuhakikisha mifugo yote iliyoainishwa kwenye muongozo ambayo ni Ng'ombe, Punda, Mbuzi na kondoo inavalishwa hereni katika maeneo yenu" alisema.


Kaimu Katibu Tawala Mkoa wa Morogoro Mhandisi Ezron Kilamhama akiongea na Wakuu wa Wilaya (DC), Wakurugenzi (DED), Makatibu Tawala wa Wilaya (DAS), Wenyeviti wa Halmashauri, maafisa Mifugo na maafisa TEHAMA wa Mkoa wa Morogoro wakati wa ufunguzi wa mkutano wa kuhamasisha zoezi la utambuzi, usajili na ufuatiliaji wa Mifugo kwa njia ya kielektroniki Mkoani humo na kuwaagiza kuakikisha elimu waliyopata inawafikia wafugaji na Mifugo yote iliyoainishwa inavalishwa hereni Disemba 21, 2021. 


Sehemu ya washiriki wa mkutano wa kuhamasisha zoezi la utambuzi, usajili na ufuatiliaji wa Mifugo kwa njia ya hereni za kielektroniki wakiwa kwenye mkutano huo Disemba 21, 2021 Mkoani Morogoro. 

 

 

 

DHAMIRA YA SERIKALI NI KUWAONDOA KWENYE UVUVI WA KUWINDA-ULEGA

Naibu Waziri wa Mifugo na Uvuvi Mhe. Abdallah Ulega amesema kuwa Serikali ya Jamhuri ya Muungano wa Tanzania na ile ya Mapinduzi ya Zanzibar zinafanya jitihada kubwa ili kuwafanya wavuvi wawe na uhakika wa kupata samaki pindi wakienda majini badala ya kuwinda kama wanavyofanya hivi sasa.

Mhe. Ulega ameyasema hayo (21.12.2021) kwenye hafla ya kuwakabidhi wavuvi vifaa maalum  vitakavyowawezesha kutambua maeneo yenye samaki kabla ya kuingia majini na kuanza shughuli ya uvuvi iliyofanyika Shehia ya Kizimkazi Mkoa wa Kusini Unguja (Zanzibar).

“Kwanza nimefarijika kuona wavuvi wengi kwenye shehia hii ni vijana hivyo nina uhakika itakuwa rahisi wao kutumia vifaa hivi na kuwafundisha wazee ambao bado wanaendelea na shughuli za uvuvi kwa hapa Kusini Unguja” Ameongeza Mhe. Ulega

Mhe. Ulega ameiagiza Mamlaka ya kusimamia uvuvi wa bahari kuu kutoa mafunzo ya matumizi sahihi ya vifaa hivyo ili wavuvi hao waanze kuvitumia ambapo ametoa rai kwa wavuvi kutumia vizuri teknolojia hiyo.

“ Lakini pia vifaa hivi tunavyogawa leo ni vichache hivyo niwaelekeze  mamlaka ya kusimamia uvuvi wa bahari kuu kuongeza wigo wa usambazaji wa vifaa hivi muhimu na hatimaye viweze kuenea kwa wavuvi wote waliopo Zanzibar na Tanzania bara” Ameagiza Mhe. Ulega.

Mhe. Ulega ameongeza kuwa hatua ya kugawa vifaa hivyo itaendelea kuchochea kampeni ya Serikali  ya Mapinduzi ya Zanzibar na ile Jamhuri ya Muungano wa Tanzania ya kuhakikisha pande hizo zinaingia kwenye uchumi wa buluu jambo ambalo ameweka wazi kuwa litainua uchumi wa wavuvi  kwa kiasi kikubwa.

Awali akisoma taarifa ya ulinzi wa rasilimali za Uvuvi kwa upande wa Visiwa vya Unguja na Pemba Kamanda wa Kikosi Maalum cha Kuzuia Magendo (KMKM) Comodore  Azana Msingiri amebainisha kuwa kumekuwa na changamoto ya baadhi ya wavuvi kutotii sheria bila shuruti ambao huiona mamlaka yake kama kandamizi pindi wakichukuliwa hatua ambapo amewataka wavuvi kutambua kuwa ulinzi wa rasilimali za Uvuvi kwa upande wa visiwa hivyo ni jukumu ambalo mamlaka yake inalitekeleza kisheria.

“Hivi karibuni kuna tukio moja lilitokea kwa baadhi ya Wavuvi kubishana na KMKM na mimi nilipopata taarifa ya kutosha kutokana na mzozo huo niliamuru kikosi hicho kiondoke katika eneo hilo kwa sababu wangeendelea wakati wao wana silaha ingeweza kutokea hata umwagaji wa damu” Amesema Comodore Msingiri.

Comodore Msingiri amewaeleza wavuvi waliofika  kwenye halfla hiyo kuwa hakuna mtu yoyote aliyepo juu ya sheria hivyo ni vizuri kufuata maelekezo yote wanayopewa na mamlaka hiyo ambapo amesisitiza kuwa mamlaka yake imejidhatiti kuhakikisha inatekeleza wajibu wake ipasavyo.

Akielezea kuhusu  mapokezi ya Wavuvi kuhusu Vifaa hivyo, Mkurugenzi wa Mamlaka ya kusimamia Uvuvi wa bahari Kuu Zahor El.Kharousy  amesema kuwa  tangu kuanza kutumika kwa vifaa hivyo  kiwango cha upatikanaji wa samaki kimeongezeka ambapo kwa hivi sasa mvuvi mmoja anaweza kupata kiasi cha kilo 38 za samaki kwa saa moja.

“Kuongezeka kwa kipato kinachotokana na Uvuvi kumewawezesha wavuvi hao kukidhi mahitaji yao ya kila siku na kufanya shughuli za maendeleo ikiwa ni pamoja na baadhi yao kujenga makazi ya kudumu, kuboresha zana za Uvuvi na kusomesha watoto wao” Amesema El. Kharousy.

Mkurugenzi huyo ameongeza kuwa katika awamu ya kwanza jumla ya vifaa 64 vya kusomea maeneo ya upatikanaji wa samaki na simu za mkononi 21 vyote vikiwa na thamani ya milioni 200.8 viligawiwa kwa wavuvi hao ambapo amebainisha kuwa fedha zote za kugharamia vifaa hivyo zimetoka katika mradi wa SwioFish unaotekelezwa kwa ufadhili wa benki ya Dunia.

Akitoa shukran kutokana na vifaa hivyo, Mkuu wa Mkoa wa Kusini Unguja Mhe.Rashid Rashid amebainisha kuwa vifaa hivyo vitakuwa msaada mkubwa kwa wavuvi waliopo kwenye mkoa wake ambapo aliwataka wavuvi hao kutumia vifaa hivyo kwa umakini ili viweze kuwasaidia kwa muda mrefu zaidi.

“Lakini pia nimemuomba Mhe. Ulega msaada wa majaketi ya kujiokoa na majanga ya majini ambapo ameahidi kunipatia majaketi  hayo hivyo nikushukuru sana Mhe. Ulega” Amesema Mhe. Rashid.

Mhe. Rashid ameeleza  kuwa mbali na vifaa hivyo, Serikali ya Mapinduzi ya Zanzibar katika kutekeleza dhana ya uchumi wa buluu imetoa jumla ya boti 70 kwa wavuvi wote wa Mkoa wake ambapo ameongeza kuwa kinachosubiriwa hivi sasa ni kupokea boti hizo.

“Boti hizi tutazigawa kwa wavuvi na tayari wenzetu wa uvuvi wa bahari kuu wameshatupa maelekezo kuhusiana na hilo lakini vile vile Mkoa wetu umepatiwa jumla ya boti 50 za uvuvi wa mwani na muda si mrefu tutapa vifaa vya uvuvi wa kaa na majongoo hivyo tunamshukuru sana Mhe. Rais wetu wa Zanzibar  na Rais wa Jamhuri ya Muungano wa Tanzania kwa kuhakikisha Uchumi wa buluu unawezekana” Amehitimisha Mhe. Rashid.

Serikali ya Jamhuri ya Muungano wa Tanzania na ile ya Mapinduzi ya Zanzibar zimekuwa zikifanya jitihada mbalimbali zitakazoziwezesha nchi hizo kuingia kwenye uchumi utakaotegemea Rasilimali za Uvuvi zilizopo ukanda wa bahari kuu (Uchumi wa buluu).


Naibu Waziri wa Mifugo na Uvuvi, Mhe. Abdallah Ulega (mwenye suti nyeusi na shati jeupe katikati) akimkabidhi mmoja wa wavuvi wa Shehia ya Kizimkazi simu itakayomuwezesha kutambua mahali penye samaki wengi  baharini katika hafla ya kukabidhi vifaa hivyo iliyofanyika l (21.12.2021) Mkoa wa Kusini Unguja (Zanzibar). Wengine pichani ni baadhi ya Viongozi wa Serikali ya Mapinduzi ya Zanzibar walioshiriki tukio hilo.* 

Naibu Waziri wa Mifugo na Uvuvi, Mhe. Abdallah Ulega akifafanua mambo yaliyofanywa na Serikali ya Jamhuri ya Muungano wa Tanzania na ile ya Mapinduzi ya Zanzibar katika kuhakikisha pande hizo kwa pamoja zinaingia kwenye Uchumi wa buluu wakati wa hafla ya kukabidhi vifaa maalum vitakavyomuonesha Mvuvi sehemu yenye samaki wengi baharini iliyofanyika  (21.12.2021) Mkoa wa Kusini Unguja (Zanzibar).

 


WAFUGAJI WASHAURIWA KUTUMIA ZOEZI LA UTAMBUZI KUPATA BIMA YA MIFUGO

Wizara ya Mifugo na Uvuvi imewataka wafugaji nchini kutumia vizuri fursa ya utambuzi wa mifugo kwa njia ya kielektroniki ili iweze kuwasaidia kupata bima ya mifugo yao ambayo wanaitegemea katika kukuza uchumi wao.

Hayo yamesemwa na Mkurugenzi Msaidizi wa Huduma za ukaguzi na Ustawi wa Wanyama Dkt. Annette Kitambi wakati wa ufunguzi wa utoaji mafunzo ya utambuzi wa mifugo kwa kuweka hereni za kielektroniki Disemba 20,2021 mkoani Tanga.

Alisema kuwa baada ya kusajili mifugo kwa njia hiyo mfugaji atapata fursa ya kuweka bima kwa mifugo yake ambayo anaitegemea ambapo itamsaidia kupunguza gharama za matibabu pindi mifugo itakapo kumbwa na magonjwa mbalimbali.

"Mfugaji anaweza akachagua mifugo yake ile iliyobora ambayo ataona akiipoteza atapata hasara kubwa kwa hiyo kwa kutumia zile namba anaweza akaweka bima kwa hiyo mifugo yake” alisema Dkt Kitambi.

Alisema kuwa pamoja na mambo mengine wafugaji watakaoshindwa kutekeleza zoezi la utambuzi watakosa fursa ya kuuza mifugo yao au kutoa mahari kama ilivyozoeleka kwa sababu mifugo hiyo itakuwa nje ya mfumo.

Kwa upande wake Afisa Mifugo Mkoa wa Tanga Issa Khatibu alisema kuwa changamoto kubwa ambayo ilikuwa ikiwakabili wafugaji mkoani humo ni muingiliano wa mifugo mingi kutoka nchi jirani.

Alisema muingiliano huo umekuwa ukisababisha wizi wa mifugo kuwa mkubwa kwa sababu ya mifugo kutotambuliwa hivyo wanaamini ujio wa zoezi hilo ni mkombozi kwa wafugaji wengi hasa waliopo mpakani.

“Tumekuwa na changamoto ya muingiliano wa mifugo kutoka nchi jirani ya Kenya kwa sababu tuko mpakani kwa hiyo hata mifugo ikiibiwa inakuwa ni ngumu kuipata lakini kwa mfumo huu wa kielektroniki utasaidia sana kuondoa changamoto hii inayotusumbua kwa muda mrefu sasa” alisema Khatibu.

 

Mkurugenzi Msaidizi Huduma za Ukaguzi na Ustawi wa Wanyama Dkt. Annette Kitambi (wa tatu kutoka kulia) akiwa kwenye picha ya pamoja na maafisa Mifugo pamoja na maafisa TEHAMA wa Mkoa wa Tanga mara baada ya mafunzo ya utambuzi usajili na ufuatiliaji wa Mifugo kwa njia ya kielektroniki Disemba 20,2021 Mkoani Tanga. 

 

Mkurugenzi Msaidizi Huduma za Ukaguzi na Ustawi wa Wanyama, Dkt. Annette Kitambi akiwasilisha mada wakati wa  mkutano wa mwongozo wa utambuzi, usajili na ufuatiliaji wa mifugo kwa njia ya hereni za kieletroniki kwa maafisa kutoka Idara ya Mifugo na Kitengo cha Habari na Mawasiliano (TEHAMA), (hawapo pichani) kutoka Mkoa wa  Tanga na wilaya zake. Disemba 20,2021. 

Kaimu Katibu Tawala Mkoa wa Tanga Bw. Sebastian Masanja akifungua mkutano wa mwongozo wa utambuzi, usajili na ufuatiliaji wa mifugo kwa njia ya hereni za kieletroniki kwa maafisa kutoka Idara ya Mifugo na Kitengo cha Habari na Mawasiliano (TEHAMA), (hawapo pichani). Disemba 20,202. 

HERENI ZA KIELEKTRONIKI KUSAIDIA KUTAMBUA MIFUGO MKOANI LINDI.*

Kaimu Katibu Tawala wa Mkoa wa Lindi Dkt. Bora Haule amesema zoezi la utambuzi wa Mifugo kwa njia ya hereni za kielektroniki,  litaleta faida nyingi ikiwepo kutambua Mifugo iliyopo katika Mkoa huo, kata na Vijiji.

Ameyasema hayo alipokuwa akifungua mafunzo ya uhamasishaji wa zoezi la utambuzi,  Usajili na Ufuatiliaji wa Mifugo kwa hereni za kielektroniki katika Mkoa wa Lindi, Disemba 20, 2021.

Dkt. Haule amesema zoezi la utambuzi wa Mifugo litasaidia kukabiliana na magonjwa ya mlipuko pia kujihakikishia kupata Masoko ya Mifugo na mazao yake ndani na nje ya nchi.

Vilevile, kuwepo kwa biashara ya Mifugo na mazao yake inahitaji kuwepo kwa mfumo madhubuti wa utambuzi, usajili na Ufuatiliaji wa Mifugo hiyo.

"Wakurugenzi na wataalam hakikisheni Elimu ya utambuzi inawafikia wafugaji ili kuweza kufanikisha zoezi hili kwa haraka na ufanisi zaidi".Amesema Dkt. Haule.

Aliongezea kwa kusema Wizara ya Mifugo na uvuvi imejipanga kwa kuanza na utambuzi kwa aina nne za Mifugo ikiwa ni Ng'ombe, Punda, Kondoo na Mbuzi.

Pia zoezi la utambuzi litafanyika kwa njia mbalimbali ikiwa ni pamoja na  kuwapa kazi makampuni binafsi yaliyosajiliwa, na Halmashauri kuweza kununua hereni za kufanya utambuzi kwa kutumia wataalamu wake.  

"Ni vizuri kila mmoja afaham vizuri miongozo, sheria na kanuni ya utambuzi, Usajili na Ufuatiliaji wa Mifugo ili waweze kutoa Elimu", Alisema Dkt. Haule.

Naye, Mkuu wa Idara ya maendeleo ya Mifugo wa Halmashauri ya Wilaya ya Mtama Dkt. Joseph Sijapenda amesema Mkoa wa Lindi unawafugaji wengi kutokana na kuwa na maeneo makubwa ya malisho, hivyo  kupitia zoezi la utambuzi wa Mifugo itasaidia kutambua idadi ya Mifugo yao kwenye maeneo husika na kuweza kupata wawekezaji katika Mkoa huo.

 

Mgeni Rasmi, Kaimu Katibu Tawala wa Mkoa wa Lindi, Dkt. Bora Haule,(katikati) akiongea na washiriki waliohudhuria kwenye mafunzo ya utambuzi wa Mifugo kwa hereni za kielektroniki, kuhusu faida ya zoezi la utambuzi wa Mifugo alipokuwa akifungua mafunzo hayo katika Mkoa wa Lindi, Disemba 20.2021, (kushoto ni Kaimu Mkurugenzi Msaidizi wa Afya ya jamii ya Mifugo, Dkt. Stanford Ndibalema  na (kulia) Katibu Tawala msaidizi uchumi na Uzalishaji,  Majid Myao.* 

 


Kaimu Mkurugenzi Msaidizi wa Afya ya jamii ya Mifugo Dkt. Stanford Ndibalema akitoa ufafanuzi wa Muongozo wa zoezi la utambuzi,  Usajili na Ufuatiliaji wa Mifugo kwa hereni za kielektroniki, kwenye mafunzo ya utambuzi wa Mifugo kwa hereni za kielektroniki, mafunzo hayo yamefanyika katika Mkoa wa Lindi, Disemba 20.2021.


HERENI ZA KIELETRONIKI KWA MIFUGO, KUDHIBITI UFUGAJI HOLELA

Na. Edward Kondela

Zoezi la uwekaji hereni za kieletroniki kwa mifugo linatajwa kusaidia kudhibiti ufugaji holela ambao umekuwa ukisababisha uharibifu wa mazingira.

Katibu Tawala Mkoa wa Mara Bw. Albert Msovela, amesema hayo leo (20.12.2021) Mjini Musoma, wakati akifungua mkutano wa mwongozo wa utambuzi, usajili na ufuatiliaji wa mifugo kwa njia ya hereni za kieletroniki mkoani humo, mkutano ambao umehudhuriwa na maafisa kutoka Idara ya Mifugo na Kitengo cha Habari na Mawasiliano (TEHAMA) katika Mkoa wa Mara na wilaya zake, na kubainisha kuwa zoezi hilo litasaidia kuwepo kwa uratibu mzuri wa maeneo ya ufugaji na malisho ya mifugo.

Amefafanua kuwa utambuzi, usajili na ufuatiliaji wa mifugo kwa njia ya hereni za kieletroniki utasaidia halmashauri za Mkoa wa Mara kuwa na matumizi bora ya ardhi, ukizingatia mkoa huo ni wa pili kwa kuwa na mifugo mingi nchini.

Akifafanua juu ya mwongozo wa utambuzi, usajili na ufuatiliaji wa mifugo kwa njia ya hereni za kieletroniki katika mkutano huo, Dkt. Audifas Sarimbo wa Idara ya Huduma za Mifugo kutoka Wizara ya Mifugo na Uvuvi, amesema hereni hizo ni bora na siyo rahisi kuharibika na kwamba zinawekewa taarifa muhimu zinazomhusu mnyama na mmiliki wake.

Aidha, amesema zoezi la uwekaji hereni za kieletroniki kwa mifugo linalofanyika kote nchini linahusu mtu mmoja mmoja pamoja na makundi mbalimbali yanayomiliki mifugo na kwamba zoezi hilo litakuwa endelevu ila katika awamu hii ya kwanza mifugo inatakiwa kuwekewa hereni kufikia Mwezi Agosti Mwaka 2022 kabla ya serikali kutoa maelekezo zaidi.

Zoezi la utambuzi, usajili na ufuatiliaji wa mifugo kwa njia ya hereni za kieletroniki linafanyika kwa mujibu wa Sheria ya Mwaka 2011 ambapo linatekelezwa kwa mfugaji kulipia gharama ya Shilingi 1,750/= kwa ng’ombe na punda na Shilingi 1,000/= kwa mbuzi na kondoo.


Katibu Tawala Mkoa wa Mara Bw. Albert Msovela akifungua mkutano wa kutambulisha mwongozo wa utambuzi, usajili na ufuatiliaji wa mifugo kwa njia ya hereni za kieletroniki Mjini Musoma, kwa maafisa kutoka Idara ya Mifugo na Kitengo cha Habari na Mawasiliano (TEHAMA), (hawapo pichani) katika mkoa huo na wilaya zake ambapo amesema uwekaji hereni kwa mifugo utasaidia kudhibiti ufugaji holela na matumizi bora ya ardhi. (20.12.2021) 

Dkt. Audifas Sarimbo wa Idara ya Huduma za Mifugo kutoka Wizara ya Mifugo na Uvuvi,   akifafanua kwa maafisa kutoka Idara ya Mifugo na Kitengo cha Habari na Mawasiliano (TEHAMA), kutoka Mkoa wa Mara na wilaya zake maelezo muhimu juu ya hereni hizo kuwa ni bora na siyo rahisi kuharibika na kwamba zinawekewa taarifa muhimu zinazomhusu mnyama na mmiliki wake. (20.12.2021) 

 


Jumanne, 11 Januari 2022

MKUTANO WA KUPITIA NA KUTHIBITISHA MPANGO KABAMBE WA UVUVI.

Katibu Mkuu, Wizara ya Mifugo na Uvuvi (Uvuvi), Dkt. Rashid Tamatamah(Mgeni rasmi) akiongea wakati akifungua Mkutano wa Wadau wa Kupitia na Kuthibitisha Mpango Kabambe wa Uvuvi unaofanyika kwa siku mbili jijini Dodoma kuanzia Disemba 20- 21, 2021.Ambapo aliwataka Washiriki wa Mkutano huo kutumia fursa hiyo kupitia kwa makini kipengere kwa kipengere na hatimaye kuthibitisha rasimu ya Mpango huo wa Mwaka 2021. 

Katibu Mkuu, Wizara ya Mifugo na Uvuvi (Uvuvi), Dkt. Rashid Tamatamah (kushoto) akijadiliana jambo na Mwenyekiti wa Bodi ya Wakurugenzi, Shirika la Uvuvi Tanzania (TAFICO), Prof. Yunus Mgaya muda mfupi baada ya kufungua Mkutano wa Kupitia na Kuthibitisha Mpango Kabambe wa Uvuvi unaofanyika kwa siku mbili jijini Dodoma kuanzia Disemba 20-21, 2021. 

 

Mkurugenzi wa Idara ya Uvuvi, Bw. Magese Bulayi akitoa neno fupi kabla ya kumkaribisha Mgeni rasmi kufungua Mkutano wa Kupitia na Kuthibitisha Mpango Kabambe wa Uvuvi unaofanyika kwa siku mbili jijini Dodoma kuanzia Disemba 20-21, 2021. 

 


Mwakilishi kutoka Shirika la Chakula na Kilimo Duniani (FAO), Dkt. Oliver Mkumbo akitoa maelezo mafupi kuhusu ushiriki wa FAO katika kuandaa Mpango Kabambe wa Uvuvi katika Mkutano wa Kupitia na Kuthibitisha Mpango huo unaofanyika kwa siku mbili jijini Dodoma kuanzia Disemba 20-21/2021

  

Katibu Mkuu, Wizara ya Mifugo na Uvuvi (Uvuvi), Dkt. Rashid Tamatamah (katikati waliokaa) akiwa katika picha ya pamoja na Wadau wa Sekta ya Uvuvi wanaoshiriki Mkutano wa Kupitia na Kuthibitisha Mpango Kabambe wa Uvuvi unaofanyika kwa siku mbili jijini Dodoma kuanzia Disemba 20-21, 2021. 

 

 

WAFUGAJI WATAKIWA KUTOA TAKWIMU SAHIHI ZA MIFUGO YAO

Na Saja Kigumbe

Afisa Mifugo na Uvuvi kutoka Halmashauri ya Wilaya ya Mkinga Mkoani Tanga, Bi.  Asha Churu amewataka wafugaji katika kata ya Duga  kutoa takwimu sahihi za mifugo wanayomiliki pindi zoezi la utambuzi, usajili na ufuatiliaji wa mifugo kwa mfumo wa hereni za kielekroniki litakapoanza.

Asha alitoa rai hiyo Disemba 19, 2021 wakati wa ufunguzi wa zoezi la kuhamasisha  wafugaji juu ya mfumo wa utambuzi wa mifugo kwa njia ya kielekroniki ambao unatarajia  kuanza Januari 2022.

Alisema kumekuwa na changamoto kwa baadhi ya wafugaji ya kutotoa takwimu sahihi za mifugo yao kwa kuhofia kupunguziwa kutokana na wingi wao, jambo ambalo limekuwa likikwamisha jitihada za Serikali hasa katika ugawaji wa maeneo ya malisho.

"Serikali inapoleta sensa ya mifugo moja kwa moja hata kwenye uwekezaji wa miundombinu ya majosho na malisho inakua ni rahisi, lakini sisi wawekezaji sasa tumekuwa na dhana ya kwamba ukitoa takwimu sahihi ya mifugo na kubainika ni mingi labda itakufa au itachukuliwa niwaambie sio kweli tujitokeze na takwimu sahihi ili kusaidia uwekezaji wa miundombinu" alisema

Mkurugenzi Msaidizi huduma za ukaguzi na Ustawi wa Wanyama kutoka Wizara ya Mifugo na Uvuvi, Dkt. Annette Kitambi aliwataka wafugaji hao kutambua umuhimu wa zoezi hilo kwani kutoshiriki kikamilifu kutawakosesha fursa ya kuuza mifugo yao ndani na nje ya nchi kwa sababu itakuwa haitambuliki kisheria.

Alisema miongoni mwa majukumu ya chama na wafugaji ni kuhakikisha zoezi hilo linafanyika kwa namna ambavyo halitaleta kero kwa wafugaji na kuhamasisha wanachama wao kujitokeza kuvalisha hereni mifugo yao yote.

"Mfugaji atakayeshindwa kusajili mifugo yake atashindwa kuuza mifugo hiyo mahali popote nchini na kimataifa,  Alisema.

Kwa upande wake, Mwenyekiti wa Wafugaji kata ya Duga, Juma Athumani aliishukuru Wizara ya Mifugo na Uvuvi kwa kuanzisha mfumo huo kwa sababu utaenda kumaliza changamoto ya wizi wa mifugo baada ya kuvalishwa hereni za kielektroniki hasa kwa wafugaji walio katika mipaka ya nchi.


Mkurugenzi Msaidizi Huduma za Ukaguzi na Ustawi wa Wanyama kutoka Wizara ya Mifugo na Uvuvi (Mifugo), Dkt. Annette Kitambi akiwaeleza wafugaji wa kata ya Duga Wilaya ya Mkinga Mkoani Tanga umuhimu  wa utambuzi usajili na ufuatiliaji wa mifugo. Disemba 19,2021. 

Mwenyekiti wa wafugaji kata ya Duga, Bw. Juma Athuman, akihamasisha wafugaji wa kata hiyo juu ya utambuzi, usajili na ufuatiliaji wa Mifugo kwa njia ya kielektroniki kwani ni njia bora na ina faida kwao na kwa Mifugo yao. Disemba 19,2021. 


MWANZA KUWA YA MFANO UWEKAJI HERENI ZA KIELETRONIKI KWA MIFUGO

Na. Edward Kondela

Katibu Tawala Mkoa wa Mwanza Bw. Ngusa Samike amewataka maafisa wa serikali na wadau wa sekta ya mifugo watakaosimamia zoezi la uwekaji hereni za kieletroniki kwenye mifugo mkoani humo, kuhakikisha Mkoa wa Mwanza unakuwa wa mfano nchini katika kufikia malengo ya zoezi hilo.

Bw. Samike amesema hayo (17.12.2021) wakati akifungua mkutano wa mwongozo wa utambuzi, usajili na ufuatiliaji wa mifugo kwa njia ya hereni za kieletroniki Mkoani Mwanza, mkutano ambao umehudhuriwa na maafisa kutoka Idara ya Mifugo na Kitengo cha Habari na Mawasiliano (TEHAMA) katika Mkoa wa Mwanza na wilaya zake, na kubainisha kuwa atakuwa mstari wa mbele katika kuhamasisha zoezi la uwekaji hereni ili liweze kufanikiwa kwa Mkoa wa Mwanza kwa kuwa ni miongoni mwa mikoa yenye mifugo mingi hapa nchini.

 

Aidha, aliwataka maafisa wa serikali na wadau wa sekta ya mifugo watakaokuwa wakitekeleza uwekaji hereni za kieletroniki kwa mifugo kumpatia taarifa kila mara na pindi wanapopata vikwazo vyovyote katika maeneo yao wampatie taarifa ili pia atoe elimu kwa viongozi wenzake na mkoa uweze kufanikiwa kusajili mifugo mingi.

“Sisi kwenye mkoa inabidi tujipange, nataka tuwe mkoa wa mfano kwenye hili zoezi na wote mnaohusika, wadau wote tutawapima kweli kweli, nitakapokuwa nakuja kwenye maeneo yenu hii itakuwa sehemu ya ajenda.” Amesema Bw. Samike

Pia, katibu tawala huyo ametaka elimu izidi kutolewa zaidi katika zoezi la uwekaji hereni za kieletroniki kwa mifugo na kuipongeza Wizara ya Mifugo na Uvuvi kwa kukishirikisha Chama Cha Wafugaji Tanzania (CCWT) ili kuongeza uelewa zaidi kwa wafugaji.

Akifafanua juu ya mwongozo wa utambuzi, usajili na ufuatiliaji wa mifugo kwa njia ya hereni za kieletroniki Dkt. Audifas Sarimbo wa Idara ya Huduma za Mifugo kutoka Wizara ya Mifugo na Uvuvi, amesema kutokana na uwepo wa viwanda vya kuchakata nyama nchini, moja ya matakwa ya wawekezaji na wateja wao kutoka nchi mbalimbali ni uwepo wa mifugo ambayo inaweza kutambulika tangu kuzaliwa kwao kabla ya kununuliwa viwandani kwa ajili ya kuchakatwa na hatimaye mazao yake kupelekwa katika masoko ya nje.

Amebainisha hatua hiyo inasadia kupata taarifa sahihi ya mazao ya mnyama huyo yanayopelekwa nje ya nchi pamoja na kufuatilia historia ya magonjwa na maeneo mifugo ilipotoka pamoja na malisho iliyokuwa ikitumia.

Ameongeza kuwa nchi itaweza kupata idadi kamili ya mifugo iliyopo katika ngazi ya taifa, mkoa, wilaya, tarafa, kata hadi kijiji na kufahamu mahitaji mbalimbali ya wafugaji yakiwemo ya idadi ya dawa za mifugo zinazohitajika kwa ajili ya mifugo yao.

Katika hatua nyingine maafisa kutoka Wizara ya Mifugo na Uvuvi wakiwa katika utambulisho wa mwongozo wa utambuzi, usajili na ufuatiliaji wa mifugo kwa njia ya hereni za kieletroniki Mkoani Mwanza, wamefika katika Kijiji cha Ng’ombe kilichopo Kata ya Igokelo Wilaya ya Misungwi mkoani humo na kukutana na wataalamu wa mifugo na viongozi wa wafugaji katika ngazi za wilaya, kata na vijiji ili kuhamasisha wafugaji kuweka hereni kwa mifugo yao, kwa maana ya ng’ombe, punda, mbuzi na kondoo.

Wakiwa kijijini hapo Katibu wa Chama Cha Wafugaji Tanzania (CCWT) Kanda ya Ziwa Victoria Bw. Masala Elias, amewaaarufu wafugaji kuwa wanatakiwa kuwekea mifugo yao hereni hadi Mwezi Agosti Mwaka 2022 kabla serikali haijatoa maamuzi mengine na kuipongeza serikali kwa kuhakikisha hereni hizo zinapatikana kwa bei nafuu, huku mmoja wa wafugaji wa Kijiji cha Ng’ombe Bw. Cloud Lugiko akihamasisha wafugaji wenzake kuanza kutekeleza zoezi hilo kwa kadri idadi ya mifugo aliyonayo kila mfugaji ili kutekeleza zoezi hilo kwa wakati.

Zoezi la utambuzi, usajili na ufuatiliaji wa mifugo kwa hereni za kieletroniki ambalo linafanyika kote nchini kwa mujibu wa Sheria ya Mwaka 2011 linatekelezwa kwa mfugaji kulipia gharama ya Shilingi 1,750/= kwa ng’ombe na punda na Shilingi 1,000/= kwa mbuzi na kondoo.


Katibu Tawala Mkoa wa Mwanza Bw. Ngusa Samike akifungua mkutano wa mwongozo wa utambuzi, usajili na ufuatiliaji wa mifugo kwa njia ya hereni za kieletroniki kwa maafisa kutoka Idara ya Mifugo na Kitengo cha Habari na Mawasiliano (TEHAMA), (hawapo pichani) kutoka Mkoa wa Mwanza na wilaya zake na kuagiza maafisa wa serikali na wadau wa sekta ya mifugo wa mkoa huo watakaosimamia zoezi la uwekaji hereni kuhakikisha Mkoa wa Mwanza unakuwa wa mfano nchini katika kutekeleza zoezi hilo. (17.12.2021) 


 Katibu Tawala Mkoa wa Mwanza Bw. Ngusa Samike (kushoto) akipewa maelezo na Afisa wa Idara ya Huduma za Mifugo kutoka Wizara ya Mifugo na Uvuvi Dkt. Audifas Sarimbo akiongozana na maafisa wengine kutoka wizarani (hawapo pichani) juu ya mwongozo wa utambuzi, usajili na ufuatiliaji wa mifugo kwa njia ya hereni za kieletroniki, zoezi ambalo linafanyika kote nchini. (17.12.2021)