IDARA YA UVUVI YAKUSANYA SHILINGI BILIONI 39.6 ZA MADUHULI KWA MWAKA WA FEDHA 2025/2026

Idara ya Uvuvi iliyo chini ya Wizara ya Mifugo na Uvuvi imekusanya Shilingi bilioni 39.6 za maduhuli katika mwaka wa fedha 2025/2026, ikiwa ni ongezeko kutoka Shilingi bilioni 32 zilizokusanywa katika mwaka uliopita, na mafanikio hayo yametokana na zoezi maalum la ufuatiliaji wa ukusanyaji wa maduhuli lililolenga kuimarisha ulipaji wa tozo stahiki, kuzuia utoroshaji wa mazao ya uvuvi na kuhakikisha utekelezaji wa sheria, kanuni na taratibu za uvuvi nchini.

Akizungumza kwa niaba ya Katibu Mkuu wa Wizara ya Mifugo na Uvuvi katika kikao kazi cha utoaji wa taarifa ya ufuatiliaji na ukusanyaji wa maduhuli kilichofanyika Julai 4, 2026, jijini Dar es Salaam, Naibu Katibu wa Wizara hiyo (Uvuvi), Prof. Mohamed Sheikh, alisema kiasi kilichokusanywa kwa mwaka wa fedha wa 2025/2026 ni Shilingi bilioni 39.6, ambapo mwaka jana kiasi kilichokusanywa kilikuwa bilioni 32 tu.

Alisema zoezi hilo lilitekelezwa katika kanda mbalimbali za uvuvi nchini, zikiwemo Nyanda za Juu Kusini, Kanda ya Kati, Kanda ya Pwani, Kanda ya Ziwa Victoria pamoja na maeneo ya mipakani ya mikoa ya Kagera, Kigoma na Geita.

Prof. Sheikh alisema ongezeko hilo linaonyesha kuwa hatua zilizochukuliwa na Wizara katika kuimarisha usimamizi wa ukusanyaji wa maduhuli zimeanza kuzaa matunda, huku zikiendelea kuongeza mapato ya Serikali.

"Kwa kipindi cha Machi hadi Juni 2026 pekee tumekusanya Shilingi bilioni 16.1 kutokana na tozo za mazao ya uvuvi, usafirishaji wa mazao hayo pamoja na faini mbalimbali. Kwa mwaka wa fedha 2026/2027 tunalenga kukusanya Shilingi bilioni 71.5 za maduhuli," alisema Prof. Sheikh.

Aliongeza kuwa mchango wa sekta ya uvuvi katika Pato la Taifa (GDP) umeongezeka kutoka asilimia 1.8 hadi asilimia 2.2, huku ukuaji wa sekta hiyo ukiongezeka kutoka asilimia 2.6 hadi asilimia 6.3 kutokana na kuimarishwa kwa usimamizi na utekelezaji wa sheria na kanuni za uvuvi.

Kwa mujibu wa Prof. Sheikh, tathmini ya Wizara imebaini kuwa ufuatiliaji wa karibu wa ukusanyaji wa maduhuli umeongeza mapato ya Serikali kwa kiwango kikubwa, na alisema wastani wa makusanyo ya kila mwezi umeongezeka kutoka Shilingi bilioni 2.9 katika kipindi cha Julai 2025 hadi Februari 2026 na kufikia Shilingi bilioni 4.02 kwa mwezi kati ya Machi na Juni 2026.

Aidha, alisema Wizara imeweka mikakati mipya ya kuhakikisha malengo ya ukusanyaji wa maduhuli yanafikiwa katika mwaka mpya wa fedha, huku akielezea kuwa tathmini hiyo itaendelea kufanyika katika sekta ya uvuvi na baadaye kupanuliwa katika sekta ya mifugo ili kuongeza ufanisi wa ukusanyaji wa mapato ya Serikali.

Prof. Sheikh alifafanua kuwa shughuli za ukusanyaji wa maduhuli zinahusisha ukaguzi wa mazao ya uvuvi yanayosafirishwa, ufuatiliaji wa usafirishaji katika maeneo ya mipakani, usimamizi wa utekelezaji wa sheria, kanuni na miongozo ya uvuvi pamoja na utoaji wa elimu kwa wadau.

Naibu Katibu Mkuu Wizara ya Mifugo na Uvuvi (Uvuvi), Prof. Mohamed Sheikh, akizungumza na Wataalam wa Wizara hiyo, katika Kikao kazi cha Utoaji Taarifa za Ufuatiliaji na Ukusanyaji wa Maduhuli ya Idara ya Uvuvi kutoka Julai 1, 2025 hadi Juni 30, 2026, kilichofanyika katika Ukumbi wa Ofisi ya Wakala ya Maabara ya Veterinari Tanzania (TVLA), Julai 4, 2026 Dar es Salaam.

Naibu Katibu Mkuu Wizara ya Mifugo na Uvuvi (Uvuvi), Prof. Mohamed Sheikh (kushoto), akifafanua jambo kuhusu utekelezaji wa Kanuni na Sheria katika Ukusanyaji wa Maduhuli kwa Wataalam wa Wizara hiyo, katika Kikao kazi cha Utoaji Taarifa za Ufuatiliaji na Ukusanyaji wa Maduhuli ya Idara ya Uvuvi kutoka Julai 1, 2025 hadi Juni 30, 2026, kilichofanyika katika Ukumbi wa Ofisi ya Wakala ya Maabara ya Veterinari Tanzania (TVLA), Julai 4, 2026 Dar es Salaam, kulia ni Kaimu Mkurugenzi wa Uvuvi Nchini, Dkt. Baraka Sekadende.

Mkurugenzi wa Idara ya Ukuzaji Viumbe Maji Nchini, Dkt. Nazael Madalla, akitoa mapendekezo, katika Kikao kazi cha Utoaji Taarifa za Ufuatiliaji na Ukusanyaji wa Maduhuli ya Idara ya Uvuvi kutoka Julai 1, 2025 hadi Juni 30, 2026, kilichofanyika katika Ukumbi wa Ofisi ya Wakala ya Maabara ya Veterinari Tanzania (TVLA), Julai 4, 2026 Dar es Salaam.

Mkurugenzi Msaidizi wa Uvuvi Wizara ya Mifugo na Uvuvi, Ndg. Christian Nzowa, akitoa  mapendekezo, katika Kikao kazi cha Utoaji Taarifa za Ufuatiliaji na Ukusanyaji wa Maduhuli ya Idara ya Uvuvi kutoka Julai 1, 2025 hadi Juni 30, 2026, kilichofanyika katika Ukumbi wa Ofisi ya Wakala ya Maabara ya Veterinari Tanzania (TVLA), Julai 4, 2026 Dar es Salaam.

Picha ni Wataalam wa Wizara ya Mifugo na Uvuvi, wakijadili na kutoa mapendekezo juu ya Ukusanyaji wa Maduhuli, katika Kikao kazi cha Utoaji Taarifa za Ufuatiliaji na Ukusanyaji wa Maduhuli ya Idara ya Uvuvi kutoka Julai 1, 2025 hadi Juni 30, 2026, kilichofanyika katika Ukumbi wa Ofisi ya Wakala ya Maabara ya Veterinari Tanzania (TVLA), Julai 4, 2026 Dar es Salaam.

Maoni

Chapisha Maoni

Machapisho maarufu kutoka blogu hii

UTEKELEZAJI WA UFUGAJI SAMAKI KWA VIZIMBA WAANZA ZIWA TANGANYIKA

Picha
Na, Edward Kondela Serikali imeanza utekelezaji wa ufugaji samaki kwa njia ya vizimba katika Ziwa Tanganyika baada ya mpango huo kuonesha mafanikio makubwa katika Ziwa Victoria. Akizungumza (11.01.2024) katika Mwalo wa Kasanga uliopo Wilaya ya Kalambo Mkoani Rukwa, Naibu Waziri wa Mifugo na Uvuvi Mhe. Alexander Mnyeti amesema tayari wizara imeanza kutoa elimu kwa wavuvi wa ukanda wa Ziwa Tanganyika kabla ya kufikisha vizimba hivyo na mbegu bora za samaki. Mhe.Mnyeti ameongeza kuwa kwa sasa serikali imetenga Shilingi Bilioni 20 kwa ajili uwekaji vizimba katika Ziwa Victoria na Ziwa Tanganyika kwa sababu ufugaji wa samaki unakua kwa kasi maeneo mbalimbali duniani kutokana na upungufu wa samaki waliopo kwenye maji ya asili yakiwemo mabonde, maziwa, mito na bahari kutokana na sababu mbalimbali ikiwemo ya uharibifu wa mazingira, ongezeko la watu na uharibifu wa mazalia ya samaki. Ameongeza kuwa ili kunusuru upungufu wa samaki katika masoko ya ndani na nje ya nchi serikali imeamua ...
Endelea kusoma

LESENI, VIBALI VYA MAZAO YA MIFUGO NA VYAKULA VYA SAMAKI KUTOLEWA KWA NJIA YA KIELEKTRONIKI

Picha
Serikali kupitia Wizara ya Mifugo na Uvuvi inatarajia kuanza kutumia mfumo wa usimamizi wa utoaji vibali mbalimbali vya kusafirisha mifugo na mazao yake ndani na nje ya nchi unaojulikana kama “ Mifugo Management Information System (MIMIS)” ambao unalenga kuboresha mazingira ya ufanyaji wa biashara za Mifugo, kukata na kuhuisha leseni za wataalam wa Mifugo na vibali vinavyohusu uingizaji, uzalishaji na uuzaji  wa vyakula vya samaki. Hayo yamebainishwa leo na Kaimu Katibu Mkuu wa Wizara hiyo anayeshughulikia sekta ya Mifugo Dkt. Charles Mhina alipokuwa akifungua mafunzo ya matumizi ya mfumo huo kwa wadau na wataalam kutoka sekta za  Mifugo na Uvuvi yaliyofanyika leo (18.05.2022) kwenye hoteli ya Royal Village jijini Dodoma. “Uwepo wa mfumo huu utatusaidia kuokoa muda wa kushughulikia vibali lakini pia utaongeza kasi ya ukusanyaji wa mapato ya Serikali na kuokoa fedha za Serikali  kwa sababu “Control Number” itazalishwa pale mtu anapofanya maombi tofauti na sasa ambapo mtu a...
Endelea kusoma

TANGAZO LA NAFASI ZA KAZI

JAMHURI YA MUUNGANO WA TANZANIA             WIZARA YA MAENDELEO YA MIFUGO NA UVUVI TANGAZO LA NAFASI ZA KAZI Serikali kupitia Wizara ya Maendeleo ya Mifugo na Uvuvi imepanga kuajiri maafisa walioorodheshwa hapa chini katika mwaka 2011/12 hivyo tunapenda   kuwatangazia Watanzania wote wenye sifa zilizoainishwa watume barua za maombi ya kazi zifuatazo: 2. Daktari Mifugo Mkufunzi Daraja la II (Veterinary Tutor II) (Nafasi 5) (a)                Sifa za waombaji Wawe wamehitimu Shahada ya kwanza   ya Sayansi ya tiba ya Mifugo kutoka Chuo Kikuu cha Kilimo Sokoine au Chuo kingine kinachotambuliwa na Serikali waliosajiliwa na Bodi ya Madaktari wa Mifugo Tanzania (b)                Majukumu -              ...
Endelea kusoma