WIZARA INATEKELEZA FALSAFA YA KUJITEGEMEA KWA VITENDO-BUTIKU

◼️ Akiri kuondolewa somo la kilimo  elimu ya msingi lilikuwa ni kosa

Mwenyekiti wa Taasisi ya Mwalimu Nyerere Bw. Joseph Butiku amekoshwa na hatua ya Wizara ya Mifugo na Uvuvi kuanzisha vituo atamizi vitakavyojishughulisha na mafunzo kwa vitendo kuhusu teknolojia ya unenepeshaji wa Mifugo.

Butiku ameyasema hayo jana (09.12.2022) ambapo alitumia siku hiyo  ya kumbukizi ya Uhuru wa Tanganyika kutembelea moja ya vituo hivyo vilivyopo jijini Tanga kwenye Taasisi ya Utafiti wa Mifugo nchini (TALIRI) na Wakala ya Mafunzo ya Mifugo nchini (LITA) kampasi ya Buhuri.

“Sisi wazee wenu tulifanya makosa makubwa huko nyuma kwa kuwapa elimu ambayo inawahamisha kwenye shughuli za msingi ambazo ndio uti wa mgongo wa uchumi wetu jambo ambalo linakinzana na falsafa ya Mwalimu Nyerere ambayo ilikuwa inasisitiza vijana kuwezeshwa elimu ya kujitegemea” Amesema Butiku.

Butiku ameongeza kuwa hatua hiyo ya uanzishwaji wa vituo atamizi ni msingi mzuri wa kukuza uchumi wa mwananchi mmoja mmoja ambapo mbali na kuwezeshwa maarifa ya ufugaji wa kisasa, mifugo yao itaongeza malighafi viwandani jambo ambalo litakuza uchumi wa nchi kwa ujumla.

“Hatutaki vijana ambao watakuwa wamesoma mpaka ngazi ya shahada ya uzamivu ya mifugo afu bado waingie mtaani kutafuta ajira wakati huko wanakotoka kwenye maeneo yao hawana hata shamba la mifugo, hiyo itakuwa ni elimu bandia” Amebainisha Butiku.

Kwa upande wake Mkurugenzi wa Utafiti, Mafunzo na Ugani kutoka Wizara ya Mifugo na Uvuvi (Mifugo) Dkt. Angelo Mwilawa amesema kuwa vituo hivyo vilivyopo jijini Tanga vina jumla ya vijana 90 ambapo vijana 30 wapo kwenye kituo cha TALIRI na wengine 60 wapo kwenye kituo cha LITA-kampasi ya Buhuri na lengo la Wizara ni kuhakikisha vijana hao wanakuwa na uwezo wa kufanya shughuli za ufugaji kwa kufuata mnyororo mzima wa thamani wa mazao ya mifugo.

“Tumeamua kuwashirikisha vijana hawa kuanzia kwenye hatua ya awali ya ujenzi wa miundombinu yote watakayoitumia kufuga kabla hatujawapa hiyo mifugo ili iwe rahisi kwao kufanya hivyo baada ya kutoka hapa kwa sababu tunahitaji wakawe walimu wazuri kwenye jamii zinazowazunguka huko watakapoenda” Amesema Dkt. Mwilawa.

Taasisi ya Mwalimu Nyerere ilifanya ziara hiyo kufuatia maelekezo waliyopewa na Rais wa Jamhuri ya Muungano wa Tanzania Mhe. Samia Suluhu Hassan ya kuhamasisha shughuli za kiuchumi kwa vijana ili kukuza uchumi wao na Taifa kwa ujumla.

Mkurugenzi wa Utafiti, Mafunzo na Ugani kutoka Wizara ya Mifugo na Uvuvi (Mifugo) Dkt. Angelo Mwilawa (kulia) akimueleza Mwenyekiti wa Taasisi ya Mwalimu Nyerere Bw. Joseph Butiku kuhusu moja ya malisho ya Mifugo yaliyopo kwenye shamba la Taasisi ya Utafiti wa Mifugo nchini (TALIRI) kituo cha Tanga muda mfupi baada ya Bw. Butiku na ujumbe wake kufika hapo  (09.12.2022)  kwa ajili ya kuona maendeleo ya kituo atamizi kilichopo kituoni hapo.

Mwenyekiti wa Taasisi ya Mwalimu Nyerere Bw. Joseph Butiku (kulia) akimpa maelekezo Mtafiti Mkuu kutoka Taasisi ya Utafiti wa Mifugo nchini (TALIRI) kituo cha Tanga Bw. Walter Mangesho muda mfupi baada ya Bw. Butiku na ujumbe wake kufika (09.12.2022) kwa ajili ya kuona maendeleo ya kituo atamizi kilichopo kituoni hapo.

Mkurugenzi wa Utafiti, Mafunzo na Ugani kutoka Wizara ya Mifugo na Uvuvi (Mifugo) Dkt. Angelo Mwilawa (kulia) akimueleza Mwenyekiti wa Taasisi ya Mwalimu Nyerere Bw. Joseph Butiku kuhusu mikakati inayotekelezwa na Wizara kwa ajili ya kuhakikisha uwepo wa malisho ya mifugo muda mfupi baada ya Bw. Butiku na ujumbe wake kufika  kwenye Taasisi ya Utafiti wa Mifugo nchini (TALIRI) kituo cha Tanga  kwa ajili ya kuona maendeleo ya kituo atamizi kilichopo kituoni (09.12.2022).

Mwenyekiti wa Taasisi ya Mwalimu Nyerere Bw. Joseph Butiku (mwenye kifimbo katikati) akiwa kwenye picha ya pamoja na baadhi ya watendaji wa Taasisi ya Utafiti wa Mifugo nchini (TALIRI) kituo cha Tanga na vijana waliopo kwenye kituo atamizi kilichopo hapo muda mfupi baada ya Bw. Butiku na ujumbe wake kuhitimisha ziara yao (09.12.2022) ambapo walifika  kwa ajili ya kuona maendeleo ya kituo hicho.