KAMATI YA BUNGE YAFANYA TATHMINI YA UTENDAJI WA MPRU

Kamati ya Kudumu ya Bunge ya Kilimo, Mifugo na Maji imefanya tahmini ya utendaji kazi wa Kitengo cha Hifadhi za Bahari na Maeneo Tengefu (MPRU) kwa lengo la kupima utendaji kazi wake na kuona kama kuna changamoto zozote zinazokikabili kitengo hicho.

 

Akizungumza mara baada ya kumalizika kwa kikao cha kamati hiyo leo (07.09.2022) kilichofanyika katika kumbi za bunge Jijini Dodoma, Waziri wa Mifugo na Uvuvi, Mhe. Mashimba Ndaki amesema kuwa lengo la kukutana na kamati hiyo ni kutathmini majukumu na utendaji kazi wa MPRU kama yanatekelezwa sawasawa.

 

Waziri Ndaki amesema kuwa baada ya kuwasilisha taarifa ya utekelezaji wa majukumu ya MPRU na kujadiliwa, kamati hiyo imetoa ushauri ambao Wizara itakwenda kuufanyia kazi ikiwa ni pamoja na kukifanya kitengo cha MPRU kuwa taasisi kamili inayojitegemea ya serikali. Lakini pia kamati imeshauri kuwa MPRU sasa ianze kusimamia maeneo yote kwa maana ya bahari pamoja na maji baridi.

 

Hata hivyo Waziri Ndaki ametoa wito kwa wananchi kuendelea kuyatunza maeneo tengefu kwa kuwa maeneo hayo hutumika kama mazalia ya samaki, hivyo watanzania kwa ujumla wanatakiwa kuhakikisha wanayalinda maeneo hayo pamoja na kupiga vita uvuvi haramu kwa kuwa ni moja ya chanzo cha uharibifu wa maeneo hayo.

 

Aidha, Waziri Ndaki amewataka viongozi wa BMU kuhakikisha wanatimiza wajibu wao, kwani kumekuwa na tatizo kwa baadhi ya viongozi hao kujihusisha na masuala ya uvuvi haramu. Hivyo Sekta ya Uvuvi imejipanga kuhakikisha inawachukulia hatua viongozi wote ambao watabainika kuhusika na uhujumu wa rasilimali za uvuvi.

 

Akizungumza wakati anafunga kikao, Mwenyekiti wa Kamati ya Kudumu ya Bunge ya Kilimo, Mifugo na Maji, Mhe. Dkt. Christine Ishengoma amesema kuwa kamati imepitia utendaji kazi wa MPRU na imaona sasa umefika wakati wa kitengo hicho kuwa taasisi kamili hivyo Wizara iendelee na mchakato wa kulikamilisha hilo.

 

Katibu Mkuu anayesimamia Sekta ya Uvuvi, Dkt. Rashid Tamatamah amesema kuwa MPRU imekuwa ikifanya kazi toka mwaka 1994. Majukumu yake makubwa ni kutambua maeneo ya kuhifadhi, kuyasimamia na kuyaendeleza. Kamati imeweza kufahamishwa muundo na majukumu ya MPRU na kwamba sasa inatakiwa kuwa taasisi kamili hivyo kuna mabadiliko ambayo yatahitajika kufanyika hadi kwenye sheria iliyoanzisha kitengo hicho.

Mwenyekiti wa Kamati ya Kudumu ya Bunge ya Kilimo, Mifugo na Maji, Mhe. Dkt. Christine Ishengoma (Mb) akifunga kikao cha kamati hiyo kilichopokea taarifa ya muundo na majukumu ya Kitengo cha Hifadhi za Bahari na Maeneo Tengefu (MPRU) ambapo amesema kuwa taarifa hiyo ifanyiwe marekebisho kulingana na ushauri uliotolewa na kamati ili taratibu nyingine ziweze kuendelea. Kikao hicho kimefanyika bungeni Jijini Dodoma. (07.09.2022)

Waziri wa Mifugo na Uvuvi, Mhe. Mashimba Ndaki (Mb) akizungumza kwenye kikao cha Kamati ya Kudumu ya Bunge ya Kilimo, Mifugo na Maji wakati Sekta ya Uvuvi ilipowasilisha taarifa ya muundo na majukumu ya Kitengo cha Hifadhi za Bahari na Maeneo Tengefu (MPRU) kwa kamati hiyo. Mhe. Ndaki amesema kuwa lengo ni kuhakikisha uhifadhi unafanyika kwenye bahari pamoja na maziwa, lakini pia ameisihi jamii kushirikiana na serikali katika kuhifadhi maeneo tengefu kwa kuwa ni mazalia ya samaki. Kikao hicho kimefanyika bungeni Jijini Dodoma. Kulia kwake ni Naibu Waziri wa Mifugo na Uvuvi, Mhe. Abdallah Ulega (Mb). (07.09.2022)

Katibu Mkuu Wizara ya Mifugo na Uvuvi (Uvuvi), Dkt. Rashid Tamatamah akitoa ufafanuzi wa baadhi ya hoja zilizoibuliwa na wajumbe wa Kamati ya Kudumu ya Bunge ya Kilimo, Mifugo na Maji baada ya kuwasilishwa kwa taarifa ya muundo na majukumu ya Kitengo cha Hifadhi za Bahari na Maeneo Tengefu (MPRU) kwa kamati hiyo. Kikao hicho kimefanyika bungeni Jijini Dodoma. (07.09.2022)

Meneja wa Kitengo cha Hifadhi za Bahari na Maeneo Tengefu (MPRU), Bw. John Komakoma akiwasilisha taarifa ya muundo na majukumu ya Kitengo cha Hifadhi za Bahari na Maeneo Tengefu (MPRU) kwenye kikao cha Kamati ya Kudumu ya Bunge ya Kilimo, Mifugo na Maji. Kikao hicho kimefanyika bungeni Jijini Dodoma. (07.09.2022)

Baadhi ya Viongozi kutoka Sekta ya Uvuvi wakifuatilia wasilisho la taarifa ya muundo na majukumu ya Kitengo cha Hifadhi za Bahari na Maeneo Tengefu (MPRU) lililowasilishwa kwenye kikao cha Kamati ya Kudumu ya Bunge ya Kilimo, Mifugo na Maji. Kikao hicho kimefanyika bungeni Jijini Dodoma. (07.09.2022)