MIFUGO SASA KUUZWA KWA UZITO, SIO KWA KUKISIA

Na Saja Kigumbe, Dar es Salaam

 

Serikali kupitia Wizara ya Mifugo na Uvuvi imetumia shs. Milioni 249.27 kununua Mizani 82 ambayo itatumika kupima uzito wa mifugo wakati wa biashara katika minada ili kuifanya biashara hiyo kuwa na tija zaidi kwa wafugaji na Taifa kwa ujumla.

 

Waziri wa Mifugo na Uvuvi, Mhe. Mashimba Ndaki aliyasema hayo katika hafla fupi ya kupokea mizani 82 iliyofanyika jijini Dar es Salaam Februari 6, 2023.

 

"Mizani inawekwa katika minada ili kuleta ushindani wa wazi wa bei kulingana na uzito wa mnyama, ni jukumu letu kuhakikisha mifugo tunayoiuza minadani inapimwa na tunajua uzito wake, ili tuweze kupata faida ya mifugo yetu," alisema Mhe. Ndaki

 

Alisema kwa muda mrefu biashara ya mifugo nchini imekuwa ikifanyika kwa kukisia na kuangalia umbo la mfugo na si uzito halisi na hivyo kuifanya biashara kutokuwa na tija inayotarajiwa huku akibainisha kuwa lengo la Serikali ni kufunga mizani hiyo katika minada yote nchini lakini kwa kuanzia wameanza na hiyo 82.

 

"Jambo hili limekuwa halina tija kwa wafugaji kwa kuwa bei inayouzwa hailingani na uzito wa mnyama, hivyo huchangia kudhoofisha kipato cha wafugaji,"alifafanua

 

Alibainisha kuwa kwa kutambua changamoto hiyo na nyingine zinazoikabili Sekta ya Mifugo, Wizara iliamua kuja na mpango wa mabadiliko ili kuifanya sekta kutoka katika kufanya shughuli zake kienyeji na kuziboresha na kuwa za kibiashara.

 

"Mwaka huu wa fedha 2022/2023 tulitenga kiasi cha Shs.Milioni 249.27 kwa ajili ya kununua mizani 82 na tayari mizani hiyo yote imenunuliwa," alibainisha

 

Aidha, aliwataka wasimamizi wa minada kuhakikisha mifugo yote inayouzwa inapimwa na kumbukumbu za mifugo iliyouzwa na uzito wake zinawekwa.

 

"Pia hakikisheni mizani iliyonunuliwa na Serikali inatunzwa, endapo kutatokea uharibifu wa makusudi ili kuzuia zoezi hili la kupima mifugo, wahusika watawajibika," alisisitiza

 

Naye, Kaimu Mkurugenzi wa jiji la Dar es Salaam, Amani Mafuru alisema kwa muda mrefu mifugo iliyokuwa ikifika katika minada biashara imekuwa ikifanyika kwa makisio lakini Wizara ikaona umuhimu wa kuwepo kwa mizani hiyo.

 

"Hii itafanya biashara iwe ya uhakika hakuna mtu anayepunjwa, mfugo ukipimwa uuzwe kwa bei ambayo mfanyabiashara alitarajia na mnunuzi anunue kwa bei tarajiwa.

Muonekano wa mzani na namna ng'ombe akipimwa wakati wa upokeaji na uzinduzi wa  mizani 82 zitakazowekwa kwenye minada nchini, Februari 06,2023 Jijini Dar es Salaam

Waziri wa Mifugo na Uvuvi Mhe. Mashimba Ndaki akikata utepe ishara ya upokeaji na  uzinduzi  wa mizani 82  ikiwa ni moja ya mpango wa mabadiliko ya Sekta ya Mifugo wakati wa hafla fupi iliyofanyika Jijini Dar es salaam, Februari 06, 2023

Waziri wa Mifugo na Uvuvi Mhe. Mashimba Ndaki akiongea na wafugaji, pamoja na wafanyabiasha wa mifugo ( hawapo pichani) wakati wa hafla fupi ya  upokeaji na uzinduzi wa mizani za kupima uzito wa Mifugo ikiwa ni moja ya mpango wa mabadiliko ya Sekta ya Mifugo  iliyofanyika jijini Dar es Salaam, Februari 06, 2023