Nav bar

Jumanne, 14 Mei 2019

KATIBU MKUU WIZARA YA MIFUGO NA UVUVI (MIFUGO) AAHIDI KUBORESHA WIZARA KUWA YA MFANO KIUTENDAJI SERIKALINI



                                                                                                                                                               

                                                                                                                                                            
 Katibu Mkuu Wizara ya Mifugo na Uvuvi (Mifugo)   Prof. Elisante Ole  Gabriel amesema anataka wizara hiyo iwe ya mfano katika kumsaidia Rais Dkt. John Magufuli katika kutimiza majukumu na malengo ya nchi kwa kufanya kazi kwa bidii na ufanisi zaidi.

Prof. Gabriel amesema hayo leo (08.05.2019) ofisini kwake jijini Dodoma wakati akipokea taarifa ya ukaguzi wa utendaji kazi wa wizara hiyo katika idara ya utawala na rasilimali watu, na kupongeza utendaji kazi wa idara hiyo katika kusimamia matakwa ya mtumishi wa umma.

 "Nina dhamira ya dhati ya kuboresha wizara na mambo yote yaliyofanyiwa ukaguzi yatafanyiwa kazi na yanaendelea kufanyiwa kazi pamoja na kusaini fomu zote za likizo kwa wakati, kupandisha watumishi vyeo pamoja na kutoa elimu ya majukumu kwa waajiriwa wote." Alisema Prof. Gabriel.

Aidha Katibu Mkuu huyo akizungumza mbele ya wakaguzi kutoka katika tume hiyo wakiongozwa na bibi Kombe Shayo, ameshauri wakaguzi kutembelea taasisi zilizo chini ya Wizara ya Mifugo na Uvuvi zikiwemo TALIRI, TAFIRI, TVLA, FETA, Bodi ya Maziwa na Bozi ya Nyama kuona wanavyofanya shughuli zao, kuonyesha kiwango au hatua walizofikia tangu kuanza kwa ukaguzi.

Hali kadhalika Prof. Gabriel ameomba wakaguzi kutoa elimu ya ‘opras’ kwa watumishi wa wizara mwishoni mwa mwezi Mei au mwanzoni mwa mwezi Juni ili watumishi waelewe vizuri na  kupewa zaidi elimu ya nidhamu ya kazi pamoja na ufanyaji kazi mzuri, ulio bora na wenye tija.

Awali akiwasilisha taarifa kwa katibu mkuu huyo, Mkaguzi kutoka Tume ya Utumishi wa Umma Bibi Kombe Shayo amesema watumishi wanapaswa kupewa elimu juu ya kujaza fomu ya ‘opras’ na watu wa masijala wapate maelekezo ya jinsi ya kutunza fomu hizo pamoja na menejimenti ya wizara kuhakikisha inapandisha watumishi madaraja na kuwathibitisha kazini kwa wakati pamoja na watumishi kupata mgawanyo wa kazi.

"Watumishi wanaenda kwenye mafunzo na wanatoa taarifa pindi wakiwa masomoni na pindi wamalizapo ambalo ni jambo zuri  na pia ufadhili upo na watumishi wakasome mapema na wasisubiri umri usogee" alifafanua Bibi Shayo.

Kwa upande wake Mkurugenzi wa Utawala na Rasilimali Watu Bw. Zakariyya Kera alipatiwa sifa za kipekee na Katibu Mkuu Wizara ya Mifugo na Uvuvi (Mifugo) Prof. Elisante Ole Gabriel pamoja na Mkaguzi wa Tume ya Utumishi wa Umma Bibi Kombe Shayo kwa kufanya kazi kwa umahiri mkubwa katika idara hiyo kutokana na kusimamia kwa ufanisi mkubwa mambo mbalimbali yahusuyo watumishi wa wizara hiyo.


Mkurugenzi wa Utawala na Rasilimali watu wa Wizara ya Mifugo na Uvuvi Bw. Zakariyya Kera akimwagiwa sifa za utendaji na mkaguzi Bi. Kombe Shayo.


Katibu Mkuu Wizara ya Mifugo na Uvuvi (Mifugo) Prof. Elisante Ole Gabriel (katikati) akiwa kwenye picha ya pamoja na wakaguzi kutoka tume ya Utumishi wa Umma  pamoja na Mkurugenzi wa Utawala na Rasilimali watu wa Wizara hiyo Bw. Zakariyya Kera (wa kwanza kushoto).


Jumatatu, 13 Mei 2019

SERIKALI ZA TANZANIA NA DENMARK ZAJA NA MPANGO WA KULINDA RASILIMALI ZA ZIWA TANGANYIKA.




SERIKALI ya Tanzania kwa kushirikiana na Serikali ya Denmark kupitia Shirika la Misaada la Kimaendeleo (DANIDA) imesema kuna haja ya kuendeleza mapinduzi makubwa katika sekta ya uvuvi nchini ili kulinda rasilimali zipatikanazo katika maziwa, bahari na mito nchini.

Akizungumza jijini Dodoma wakati wa kupokea taarifa ya utafiti uliofanywa katika Ziwa Tanganyika lililopo Mkoani Kigoma, kutazama mabadiliko ya tabia nchi katika eneo la ziwa hilo, Naibu Waziri wa Mifugo na Uvuvi Mhe. Abdallah Ulega amesema utafiti huo umeonyesha wazi kuwa zipo athari zinazotokana na tabia nchi na sababu zingine kama idadi ya wavuvi kuongezeka na baadhi yao kutumia zana haramu za uvuvi na kuathiri mazingira ya ziwa na rasilimali zilizopo.

Mhe. Ulega amesema mambo yote ambayo yamefanyiwa utafiti yakijadiliwa vyema litatolewa tamko la Sera ambayo itakuwa ni ushauri wa kitaalam ambao utaiongoza serikali ikiwa inaendelea kufanya maboresho ya kanuni na sheria za uvuvi.

"Kitu hiki ni muhimu sana kwa sababu eneo la Ziwa Tanganyika watu wanatengemea sana kwa shughuli za kujipatia samaki na kuendesha maisha yao, ile rasilimali tusipoweza kuweka mkakati mzuri wa kuitunza na kuhakikisha kuwa inakuwa endelevu basi maana yake jamii ile kuna wakati ile rasilimali kama sasa hivi kiasi cha samaki kimepungua sio kama ilivyokuwa huko kipindi cha nyuma”. Alisema Mhe. Ulega

Amefafanua kuwa ni muhimu kuchukua hatua mbalimbali za kielimu kwa kuwaelimisha wavuvi, hatua za kusimamia kwa kutumia njia zilizo bora zaidi ili kupatikana kwa uendelevu wa rasilimali zilizopo katika Ziwa Tanganyika.

“Kinyume na hapo watu watakosa zile fursa na umasikini utajikita zaidi kwa hivyo ni muhimu kudhibiti na kuweza kuwa na mpangilio mzuri ili mradi ile rasilimali iweze kuwa endelevu”. Alifafanua Mhe. Ulega

Aidha Naibu Waziri Ulega amebainisha kuwa serikali na wananchi kwa ujumla ina jukumu la kudhibiti shughuli za   kibinadamu ziendane na utaratibu wa ulinzi wa mazingira ili kudhibiti athari za mazingira.

Naye Katibu Mkuu Wizara ya Mifugo na Uvuvi (Uvuvi) Dkt. Rashid Tamatamah amesema matokeo hayo ya utafiti yamekuja wakati muafaka kwa sababu baadhi ya majukumu ya kisera ambayo wameyaleta yanahusiana na zoezi ambalo linaendeshwa na wizara la kuboresha Sheria ya Uvuvi ya mwaka 2003 ili iendane na hali halisi ya sasa.

“Tumekusanya maoni kwa wadau nchi nzima na sasa tunachambua yale maoni tuangalie maendeleo yanayotakiwa, kwa hiyo na hawa katika ushauri wanaokuja nao na matamko ya kisera kuna maeneo vilevile kutokana na uchunguzi waliofanya wanaona ili tuendelee vizuri katika kujenga rasilimali za uvuvi katika Ziwa Tanganyika kuna vitu tunatakiwa tubadilishe kwenye sheria hivyo wamekuja muda muafaka na tumefurahi sana”. Alisema Dkt. Tamatamah

Hali kadhalika, Bw. Ismail Aron Kimbilei ambaye ni Mkurugenzi wa Kituo cha Utafiti wa Uvuvi Tanzania (TAFIRI) Mkoa wa Kigoma amesema wamependekeza Ziwa Tanganyika kupumzishwa kwa shughuli za uvuvi kila baada ya muda fulani ili kuongeza mazalia ya samaki.

“Naamini kwamba yatafanyiwa kazi na naamini utafiti wetu utakuwa  na faida kama watawahusisha wadau kwamba wavuvi wawekwe chini na waelezwe faida za kutunza ziwa na waelezwe hasara za kufanya kinyume na matarajio halafu waangalie na waamue  kwa pamoja na wanaweza kufanya kwa mfano tuu tuanze kwa kufunga miezi mitatu tuone matokeo yake kama dagaa na migebuka itakuwa imeongezeka na baada ya hapo wataamua cha msingi ni kushirikisha wadau.” Alisema Bw. Kimbilei


Naibu Waziri wa Wizara ya MIfugo na Uvuvi Mhe. Abdallah Ulega katika picha ya pamoja na Watafiti wa kutazama mabadiliko ya tabia nchi katika eneo la Ziwa Tanganyika na wawakilishi wa Wizara ya Mifugo na Uvuvi jijini Dodoma.


WAFUGAJI KITETO WAKABIDHIWA HATI MILIKI YA NYANDA ZA MALISHO.




Serikali kupitia Wizara ya Mifugo na Uvuvi imewezesha kupatiwa hati miliki ya kimila Nne (4) kwa kikundi cha wafugaji  cha Olengapa kupitia mradi wa Uendelezaji wa Nyanda za Malisho (SRMP).

Tukio hilo la kukabidhi hati miliki ya kimila kwa Kikundi cha Wafugaji lilifanyika katika Kijiji cha Lengatei Wilaya ya Kiteto Mkoa wa Manyara.

Wizara ya Mifugo na Uvuvi kwa kushirikiana na Wizara ya Ardhi, Nyumba na Maendeleo ya Makazi kupitia mradi wa SRMP imeweza kutoa hati hiyo kwa kikundi cha wafugaji cha Olengapa vinavyoruhusu kutumia na kumiliki eneo la malisho kwa pamoja.

Akizungumza kwa niaba ya Katibu Mkuu Sekta ya Mifugo,Prof Elisante Ole Gabriel, Mkurugenzi wa Utawala na Rasilimali Watu Bw. Zakariyya Kera alisema, eneo hilo lililotengwa linaukubwa wa hekta 30,145.

Alisema pia, lengo ni kuwapatia  haki wafugaji ya uhakika wa kumiliki Ardhi kwa shughuli zao za kiuchumu na kijamii.

Akizungumza kwa niaba ya Mkuu wa Mkoa wa Bw. Manyara Alexanda Mnyeti, Mkuu wa Wilaya ya Kiteto Bw. Tumaini Magesa alisema, nashukuru wizara ya Mifugo na uvuvi kuheshimu ilani ya Chama cha mapinduzi kwasabau ni hitaji la chama tawala na hili limefanikiwa.




Mkurugenzi wa Utawala na Rasilimali watu Bw. Zakariyya Kera akisoma hotuba kwa ufupi kwa niaba ya Katibu  Mkuu sekta ya Mifugo.



Mwenyekiti wa kikundi cha Olengapa Bw. Kilekeni Noongejeck akipokea hati miliki ya kimila kwa niaba ya kikundi kutoka kwa mgeni rasmi  Bw. Tumaini Magesa

WAFUGAJI WAASWA KUBADILIKA KIFIKRA NA KUFUATA SHERIA




SERIKALI imewataka wafugaji nchini kubadili fikra zao na kutambua umuhimu wa kufuata sheria, taratibu na kanuni za nchi ili kujiepusha na mkono wa sheria pindi wanapoingiza mifugo yao katika hifadhi na mapori ya akiba.

Akizungumza na baadhi ya wafugaji jana (20.04.2019) katika Wilaya ya Meatu, Mkoani Simiyu, Katibu Mkuu Wizara ya Mifugo na Uvuvi (Mifugo) Prof. Elisante Ole Gabriel amesema baadhi ya wafugaji wamekuwa wakiingiza mifugo yao katika hifadhi na mapori ya akiba, hivyo kusababisha kutokuwepo kwa mahusiano mazuri kati yao na wahifadhi kwa madai ya kuonewa ilhali wahifadhi hao wanatakeleza sheria za nchi.

“Tunatamani fikra za wafugaji wote nchini zibadilike na zianze kutambua umuhimu wa kufuata sheria, taratibu na kanuni, ndiyo msingi wa mafaniko. Niwaombe wafugaji wote nchini watambue kwamba Wizara ya Mifugo na Uvuvi itapenda wafugaji wafuate sheria, taratibu na kanuni, tukifanya hivyo tutakuwa marafiki wa wizara unapokuwa mhalifu unakuwa tena siyo mfugaji bali unakuwa mhalifu.” Alisema Prof. Gabriel.

Katibu mkuu huyo amelazimika kukutana na wafugaji hao kutokana na hivi karibuni ng’ombe kukamatwa katika Pori la Akiba la Maswa ambapo wamiliki wa ng’ombe hao wamekiri kufanya kosa na kulipa faini waliyotozwa na mahakama mara baada ya kukiri kosa na kutiwa hatiani.

“Hivi karibuni ng’ombe walikamatwa katika Pori la Akiba la Maswa, ndipo busara ikatumika kuona jambo hilo linafikia tamati ambapo wahusika wamekabidhiwa ng’ombe zao kwa kuwa busara imetumika na siyo kwamba wao wameshinda, kwa mujibu wa sheria wenzetu wa hifadhi wanachofanya ni kusimamia Sheria Namba Tano ya Mwaka 2009 ya Hifadhi ya Wanyamapori kwamba mifugo ikikamatwa inaweza kutaifishwa.” Alifafanua Prof. Gabriel.

Awali akizungumza na viongozi wa Halmashauri ya Wilaya ya Meatu kabla ya kuzungumza na wafugaji hao, Katibu Mkuu Wizara ya Mifugo na Uvuvi (Mifugo) Prof. Elisante Ole Gabriel amewashukuru madiwani wa halmshauri hiyo wakiongozwa na Makamu Mwenyekiti wa Halmashauri ya Wilaya ya Meatu Mhe. Juma Issack Mpina kwa uelewa wa hali ya juu baada ya Meneja wa Pori la Akiba la Maswa Bw. Lusato Masinde kutoa elimu na sheria iliyotumika na maamuzi yaliyotolewa na mahakama kwa wafugaji waliyoingiza mifugo katika Pori la Akiba la Maswa.

Aidha amebainisha kuwa kunapaswa kuwepo kwa mawasiliano mazuri kati ya viongozi na jamii ya wafugaji katika maeneo yote nchini ili kujenga mahusiano mazuri na kuelewa majukumu ya wasimamizi wa hifadhi na mapori ya akiba ambao wamekuwa wakisimamia sheria na kwamba hawapo kwa ajili ya kumuonea mtu yeyote.

Katika kikao na wafugaji Prof. Gabriel amewataka pia wasijichukulie sheria mkononi hata wanapokuwa wamepishana kauli na wasimamizi wa sheria kama ambavyo imekuwa ikijitokeza katika maeneo mbalimbali nchini ambapo amebainisha kuwa kwa kufanya hivyo ni kosa kubwa kisheria, huku akiwapongeza wafugaji wa Wilaya ya Meatu kwa kuwa watulivu na kuonesha ushirikiano kwa maafisa wa Pori la Akiba la Maswa baada ya kuingiza mifugo yao katika pori hilo kinyume na sheria na kutii hatua za kisheria zilizochukuliwa dhidi yao.

Akizungumza na wafugaji Katika kuhakikisha sekta ya ufugaji inaboreka katika maeneo mbalimbali nchini ikiwemo Wilaya ya Meatu, Mkoani Simiyu, Katibu Mkuu Wizara ya Mifugo na Uvuvi (Mifugo) Prof. Elisante Ole Gabriel amesema wizara inahakikisha kwa juhudi zote inaboresha sekta ya ufugaji nchini yakiwemo malisho bora kwa kuwepo kwa shamba darasa katika wilaya hiyo na maeneo mengine.

Pia Prof. Gabriel amewataka wafugaji kufuga kisasa kwa kuwa na ng’ombe wanaopatikana kwa njia ya uhimilishaji ambao wamekuwa na matokeo mazuri kwa kuwa na nyama nyingi na maziwa mengi yenye ubora.

“Ukifuga wa kisasa wa ng’ombe wanaopatikana kwa njia ya uhimilishaji hautajivunia idadi ya ng’ombe ulionao bali kwa kilo na wingi wa maziwa ambao ng’ombe hao wanatoa, ambapo ng’ombe mmoja anafikia hadi kilogram 800 na tumehakikisha kama wizara wafugaji wanapata mbegu za ng’ombe bora kwa bei isiyozidi Shilingi Elfu Tano.” Alisema Prof. Gabriel

Kwa upande wake Meneja wa Pori la Akiba la Maswa Bw. Lusato Masinde amesema wapo kwa ajili ya kuwasaidia wananchi na kwamba wataendelea kusimamia sheria.

“Sisi tutaendelea kutoa elimu ili wananchi wafahamu umuhimu wa sheria zilizopo nchini ikiwemo inayohusu maeneo ya hifadhi na mapori ya akiba ili wananchi wasifanye shughuli zinazokatazwa katika maeneo hayo.” Alisema Bw. Masinde.

Amefafanua wao kama maafisa wanaolinda Pori la Akiba la Maswa wanahitaji ushirikiano kutoka kwa wananchi hususan wafugaji wa Wilaya ya Meatu ili kujiepusha na vitendo vinavyoweza kuwatia hatiani kwa kukiuka sheria za nchi ambazo wamepewa kuzisimamia.

Nao baadhi ya wafugaji walioshiriki kikao cha Katibu Mkuu Wizara ya Mifugo na Uvuvi (Mifugo) Prof. Elisante Ole Gabriel wameomba kupata elimu zaidi juu ya uhimilishaji ili waweze kufuga ng’ombe kisasa na wenye tija kiuchumi.

Pamoja na hilo wamewaomba pia wafugaji wenzao kufuata sheria, taratibu na kanuni za nchi na kuwa karibu na viongozi wa wilaya hiyo ili waweze kufanya shughuli zao kwa kufuata maelekezo yao na kuwa na mawasiliano mazuri ambayo yatawaepusha kutojiingiza na ukiukwaji wa sheria kwa kuingiza mifugo kwenye maeneo wasiyoruhusiwa.



Katibu Mkuu Wizara ya Mifugo na Uvuvi (Mifugo) Prof. Elisante Ole Gabriel akiwa katika matukio mbalimbali alipofanya kikao na wafugaji katika Wilaya ya Meatu, Mkoani Simiyu juu ya umuhimu wa kufuata sheria.

 


NORWAY YAISAIDIA SEKTA YA UVUVI NCHINI



SERIKALI ya Tanzania kwa kushirikiana na Shirika la Maendeleo la NORAD, Norway imesaini mkataba wa uzalishaji samaki aina ya Sato zaidi ya tani 100,000 kwa mwaka katika kipindi cha miaka 10 ijayo.

Akizungumza jana jijini Dar es Salaam wakati wa uzinduzi wa mradi huo kwa niaba ya Waziri wa Mifugo na Uvuvi,  mhe.Luhaga Joelson Mpina, Katibu Mkuu wa sekta ya Uvuvi  Dk. Rashid Tamatamah amesema,  mradi huo umekuja muda muafaka wakati nchi ina mahitaji makubwa.

Amesema lengo la Serikali ni kuzalisha samaki kwa wingi ambapo utatekelezwa kwa kipindi cha miaka mitano kwenye mabwawa.

Amesema mradi huo umekuja kwa sababu ya kazi nzuri ya asasi ya Norges Vel, Chama cha Ukuzaji Viumbe Maji Tanzania (AAT) na Wakala ya Elimu na Mafunzo ya Uvuvi (FETA).

Aliongeza kuwa katika kipindi cha miaka 20 sasa Tanzania imekuwa haifanyi vizuri katika sekta ya uvuvi ambapo imekuwa ikizalisha samaki tani 350,000 hadi 380,000 kwa mwaka."Samaki wanaozalishwa hivi sasa kwenye vyanzo vya maji idadi yake imebaki kuwa vilevile haiongezeki kwa kasi hivyo kuna kila haja ya kuongeza kasi ya uzalishaji,"alisema Tamatamah.

Amesema serikali ina nia ya dhati katika kuendeleza ufugaji samaki japokuwa imekuwa ikikabiliwa na changamoto kadhaa.Tamatamah amesema fursa zilizopo hapa nchini ni pamoja na vyanzo vya vya maji, hali ya hewa na mazingira lakini wameshindwa kuzalisha tani za kutosha.

Amesema hadi sasa Tanzania imekuwa ikizalisha tani 16,000 wakati Norway inazalisha tani milioni 2.5 kwa mwaka."Hii ni fursa kwetu kwakuwa wenzetu wana ujuzi wa uzalishaji samaki, itasaidia kutuongezea ujuzi na sisi,"alisema Tamatamah.

Alibainisha kuwa Mradi huo utatekelezwa Kibaha mkoani Pwani ambapo vijana watapata fursa ya elimu pamoja na kuzalisha samaki.

Amesema anaamini hakuna uzoefu mbadala kwa mbinu hiyo kwani ni moja ya njia sahihi ya kupata ujuzi. Kwa upande wake, Mkuu wa Wilaya ya Kibaha, Assumpter Mshama alisema mradi huo ni fursa na neema kwa wananchi wa Kibaha.

Alisema anaamini mradi huo utaongeza idadi ya samaki wanaozalishwa nchini pamoja naa kukuza uchumi wa nchi.

Naye, Balozi wa Norway nchini Tanzania, Elizabeth Jacobson alisema, ana imani mradi huo utafungua fursa kwa vijana na kukuza uchumi wa nchi.

Alisema mradi huo umeletwa ili kutokomeza changamoto zilizopo za uhaba wa samaki pamoja na kufungua njia za ujasiriamali kwa wananchi.


Katibu Mkuu Wizara ya Mifugo na Uvuvi (Uvuvi) Dkt. Rashidi Tamatamah, akihutubia kwa niaba ya Waziri wa Mifugo na Uvuvi Mhe. Luhaga Joelson Mpina kwenye hafla ya Uzinduzi wa Mradi wa Ufugaji wa Samaki iliyofanyika katika ofisi za Wizara jijini Dr es salaam.

Alhamisi, 4 Aprili 2019

MWEKEZAJI MKOANI MARA KUJENGA KIWANDA CHA NYAMA.




Mwekezaji katika sekta ya mifugo mkoani Mara, Mh. Vedastus Matayo, ambaye pia ni Mbunge wa jimbo la Musoma mjini, baada ya kutembelewa na Dawati la sekta binafsi kutoka Wizara ya Mifugo na Uvuvi ameamua kuanzisha kiwanda cha nyama mkoani hapo ili kuboresha soko la mifugo katika mkoa huo  na ajira watanzania.

Hayo yalibainishwa hivi karibuni na Mbunge huyo wakati alipotembelewa na Dawati la sekta binafsi  katika maeneo ya shughuli zake za ufugaji Wilayani Sengereti na Bunda, kwa lengo la kuibua na kushawishi kuwekeza kibiashara kwa Mbunge  huyo.

Mbunge huyo aliwambia wataalam hao wa Dawati kuwa ana mifugo aina, Ng’ombe zaidi ya 2000 aina ya Borani ambao ndiyo wengi na aina nyingine ya semental ambao ni wachache, mbuzi zaidi ya 2500 na kondoo zaidi ya 1000, mifugo yote hii iko wilaya za Bunda na Sengereti.

Aidha aliwaeleza aina ya ufugaji anaofuga wa kugoresha mifugo hiyo ya asili kwa njia ya uhimilishaji kwa kuchukua mbegu bora za mifugo toka NAIC Arusha na kuja kuchanganya na ng’ombe wetu majie wa asili ili kupata ng’ombe chotara mwenye uwezo wa kutoa nyama nyingi na maziwa mengi kuliko wale wa kienyeji.

Aliwaeleza wanadawati hilo la sekta  binafsi kuwa kwa kufanya hivyo ameweza zalisha mifugo mingi ambayo soko lake likawa ni changamoto, hivyo kuhitaji kuwa na kiwanda cha kuchakata nyama mkoa wa Mara.

Akizungumzia soko la mifugo hiyo baada ya kuizalisha kwa wingi na kuinenepeshamifugo hiyo alisema kuwa anauza kwa wenyeji wenye mabucha mkoani Mara na wakati mwengine huwauza nchi, nchini Kenya ng’ombe wa nyama.

Aidha kwa upande wa ng’ombe wa maziwa ambapo chotara hutoa maziwa mengi kiasi kuliko wale wa asili hufanya matumizi ya familia yake na wafanyakazi katika shughli zake za ufugaji na kilimo.

Kutokana na rasilimali hiyo kubwa aliyokuwanayo bwana Matayo ya mifugo na soko la mifugo hiyo ni changamoto kutegemea mkoa wa Mara tu na nchi jirani, dawati la sekta binafsi walimshauri kuanzisha kiwanda cha kuchakata nyama ili rasilimali ya mifugo mingi aliyo nayo ipate soko  katika kiwanda hicho.

Vilevile wataalam wa dawati walisema akianzisha kiwanda atazalisha bidhaa zitokanazo na nyama na kuziuza kwa bei yenye manufaa kwa vile atakuwa ameongeza thamani badala ya kuuza malighafi ya ng’ombe hai au mifugo hai, Mh. Matayo alikubaliana nao na kuahidiwa atapatiwa mkopo toka Banki ya maendeleo ya kilimo (TADB) na watashirikiana naye kuandaa andiko la mkopo huo wenye riba nafuu.



Mh. Mbunge wa Musoma mjini Mh. Vedastus Mathayo akiwa ofisini kwake akiongea na wataalamu wa dawati la sekta binafsi ambao hawaonekani pichani.

SERIKALI IMEANDAA SHERIA MPYA YA UKUZAJI VIUMBE MAJI




Serikali imeandaa sheria mpya ya ukuzaji viumbe maji ili kuboresha sheria ya zamani ya uvuvi ya namba 22 ya mwaka 2003 ikiwa ni hatua itakayosaida kuweka mazingira bora kwa ajili ya wadau wa uvuvi na kuweza kutambua idara ya ukuzaji viumbe maji

Haya yalibainishwa jana na Katibu Mkuu wa sekta ya uvuvi Dkt. Rashidi Tamatama  Wakati akifungua mkutano wa kutoa maoni kwa wadau wa uvuvi toka kanda ya  kati Dodoma kwenye ukumbi ya Holly Cross Jijini Dodoma.

Katibu Mkuu huyo alisema kuwa sheria hiyo mpya ya ukuzaji viumbe maji itajenga mazingira mazuri kwa wadau wa uvuvi kufanya kazi zao bila vikwazo.

Aliendelea kusema kuwa sheria mpya itasaidia kujenga serikali ya awamu 5 ya uchumi wa viwanda vya kati katika sekta ya uvuvi.

Katibu Mkuu huyo aliwaambia wadau hao kuwa serikali itawezesha sheria hiyo ya ukuzaji viumbe maji ili kufikia mahitaji sera ya Taifa ya uvuvi ya mwaka 2015 ilivyosema mikakati imeelekezwa kuendeleza rasilimali ya mazao ya baharini ikiwemo samaki.

Dkt. Tamatama alisema kuwa sera ya Taifa ya Uvuvi pia inalenga kuendeleza ukuaji viumbe maji ambavyo ni pamoja na kuunda rasilimali ya samaki pamoja na viumbe wengine wa baharini.
Aidha alisema sheria mpya itasaidia nchi kwenda na mabadiliko ya sayansi na teknolojia zinazotumika katika sekta ya uvuvi.

Vilevile Katibu Mkuu Dkt. Tamatama amesema sheria mpya itasaidia kuipatia serikali uhalali wa kufanya kazi ili kuboresha ulinzi wa rasilimali ya uvuvi na mazao yake.

Hivyo Katibu Mkuu huyo alisema sheria hii inakuja kwa wakati muafaka, wakati idadi kubwa ya wanajihusisha na ufugaji wa samaki kama chanzo cha kuongeza kipato cha maisha yao.
Mkutano huo uliwakutanisha wavuvi, wafanyabiashara ya samaki ambao walitoa maoni yao mbalimbali ili kuboresha rasimu ya sheria hiyo mpya kabla ya kwenda bungeni kujadiliwa na kupitishwa.



Katibu Mkuu sekta ya uvuvi Dkt. Rashid  Tamatama  akifungua mkutano wa wadau wa uvuvi wa kutoa maoni ya sheria mpya

ZOEZI LA UOGESHAJI WA MIFUGO KANDA YA KATI

WIZARA ya mifugo na uvuvi, imeandaa mikakati ya kuboresha sekta ya mifugo hapa nchini, moja ya mkakati huo ni ule wa kudhibiti magonjwa ya mifugo ambapo imewahimiza wafugaji kuzingataia matumizi ya majosho yenye dawa za kuogesha ng’ombe ili kutokomeza magonjwa yatokanayo na kupe.

Hayo yalielezwa hivi karibuni na Naibu Waziri wa mifugo na uvuvi Mheshimiwa Abdalah Ulega wakati wa zoezi la uhamasishaji wa uogeshaji wa ng’ombe kanda ya kati mkoani Singida, katika kijiji cha Mgori kilichopo halmashauri ya wilaya ya Singida vijijini.

Katika uhamasishaji huo waziri Ulega aliwataka wafugaji kufanya zoezi la uogeshaji wa mifugo uliyoanzishwa uwe wenye tija na endelevu, kwa vile hivi sasa hakuna sababu za kushindwa kuogesha mifugo  yao katika majosho yenye dawa ya kudhibiti  kupe yaliyotolewa na serikali bure.

Alisema hivi sasa serikali katika zoezi hili, imetoa dawa bure kwa halmashauri zote nchini, na kukarabati majosho yote yaliyokuwa hayafanyi kazi, ili wafugaji waweze kuogesha mifugo yao, kukinga ugonjwa hatari unaoenezewa na kupe, ambao unaoongozwa katika vifo vya ng’ombe hapa nchini.

Hapo, mwanzo shughuli hizo zilikuwa zikifanywa kwa kutofuata taratibu nzuri za makusanyo yalikuwa yakitoka kwa wafugaji walipokuwa wakipata huduma za kuogesha mifugo yao, hazikuwa na taarifa ya mapato na matumizi na hivyo kushindwa kuwa na utaratibu endelevu wa shughuli hiyo, majosho mengi yalisimama kufanya kazi na mifugo haikugoeshwa.

Katika kampeni hii ya uhamasishaji wa uogeshaji wa mifugo, tozo imepunguzwa ambapo hivi sasa kila ng’ombe anaogeshwa katika majoshi ni shilingi 50 tu, huku nyuma uogeshaji ulikuwa unatozwa wastani wa shilling mia 200 kwa kila ng’ombe na kwa mbuzi ilikuwa shililngi 10.

“nyie wafugaji msikalie rasilimali hii ya mifugo mliokuwa mnayo, kwani ni uchumi mkubwa sana mliyokuwa nayo kwenu na pia kwa Taifa ili kuongeza mapato, yanayotokana na mifugo yenu” alisema mheshimiwa Ulega.

Aidha alifafanua kuwa ufugaji kwa kufuata taratibu za ufugaji wa kisasa na kibiahsra kwa kuvuna mifugo inapozidi katika eneo uliyokuwa nayo, itakusaidia kupata kipato katika kuboresha maisha yako na ya familia.  Uhamasishaji huu unafuatia uzinduzi wa kampeni ya uogeshaji wa mifugo, iliyofanywa na Waziri wa Mifugo na Uvuvi, Mh. Luhaga Mpina  katika kijiji cha Buzirayombo Halmashauri ya Chato Mkoa wa Geita.

Naibu Waziri Wa Mifugo Na Uvuvi Mh. Abdallah Ulega, katikati mwenye shati la rangi ya bluu  akiandaa dawa ya josho ili kuogesha mifugo


MIGOGORO MIKUBWA 14 KATI YA 29 YATATULIWA NA WIZARA YA MIFUGO NA UVUVI
Naibu Waziri wa Mifugo na Uvuvi Mhe. Abdallah Ulega amesema wizara kupitia timu yake maalum ya kushughulikia migogoro, hadi sasa imetatua migogoro mikubwa 14 kati ya 29 inayohusisha wakulima na wafugaji pamoja na hifadhi na wawekezaji.

Naibu Waziri Ulega amebainisha hayo alipokuwa akizungumza na Mkuu wa Wilaya ya Hai Mkoani Kilimanjaro Bw. Lengai Ole Sabaya pamoja na viongozi wengine wa wilaya hiyo, mara baada ya kuarifiwa kuwepo kwa mgogoro wa wakulima na wafugaji katika Wilaya ya Hai na kubainisha kuwa ni hatari kwa jamii inayoishi pamoja kuwa na mgogoro wa aina hiyo.

“Nitamsisitiza katibu mkuu mifugo aliangalie kwa karibu sana hili kwa sababu ni hatari sana kwa jamii inayoishi pamoja kutokuwa na maelewano ya kuachiana maeneo kwa ajili ya shughuli zao za kiuchumi.” Alisema Mhe. Ulega

Mhe. Ulega ametoa kauli hiyo baada ya Mkuu wa Wilaya ya Hai Bw. Lengai Ole Sabaya kumuarifu kuwa baadhi ya maeneo yenye migogoro ni Kata ya KIA ambapo wafugaji wamekuwa wakiingiza mifugo yao katika maeneo ya uwanja wa ndege wa KIA, pamoja na wakulima wilayani humo kutotaka kuwaachia wafugaji maeneo wasiyoyatumia kwa kilimo hususan yenye magadi kwa ajili ya malisho kwa wafugaji hivyo kutengeneza chuki dhidi yao.

Naibu Waziri Ulega amemshauri pia mkuu huyo wa wilaya kutumia Chuo cha Mifugo Tengeru na Kituo cha Uhimilishaji cha Taifa (NAIC) vilivyopo Mkoani Arusha ili kuleta mabadiliko kwa wafugaji katika Wilaya ya Hai Mkoani Kilimanjaro kwa kuwa na ng’ombe wachache na wenye tija ukizingatia ukanda huo kuna kiwanda cha maziwa cha Tanga Fresh ambacho kinahitaji maziwa kwa wingi katika uzalishaji wao.

“Ukanda huu kuna kiwanda cha maziwa cha Tanga Fresh ambacho kinahitaji lita laki moja ya maziwa kwa siku na bado hayatoshelezi hadi inawalazimu kuchukua maziwa kutoka mikoa ya Iringa na Njombe ni vyema mkashirikiana na wizara kutoa elimu ili wafugaji wa wilaya hii wabadilike kwa kufuga kisasa hususan ng’ombe wa maziwa badala ya kuwa na ng’ombe wengi wasio na tija kiuchumi.” Alisema Mhe. Ulega

Naibu Waziri Ulega amemshauri pia mkuu wa wilaya Bw. Sabaya kuwa na kampeni maalum ya kutoa elimu kwa wafugaji pamoja na kushirikiana na wataalam ili wilaya hiyo iwe ya mfano katika kubadilisha fikra za wafugaji.
Kwa upande wake Mkuu wa Wilaya Hai Bw. Lengai Ole Sabaya amesema changamoto kubwa zilizopo wilayani hapo ni mgogoro kati ya wakulima na wafugaji ambao tayari upo katika hatua mbalimbali za kutatuliwa pamoja na wafugaji kutokuwa tayari kubadilika kutoka kwenye ufugaji wa zamani wa kuwa na makundi makubwa ya mifugo isiyo na tija.

Kufuatia mazungumzo baina yake na Naibu Waziri wa Mifugo na Uvuvi Mhe. Ulega, mkuu huyo wa wilaya amesema atazidi kushirikiana na wizara hiyo ili kuhakikisha changamoto hizo zinatatulika na kuifanya wilaya hiyo kuzidi kunufaika na mifugo iliyopo.


Naibu Waziri wa Mifugo na Uvuvi Mhe. Abdallah Ulega akifafanua jambo kwa viongozi wa Wilaya ya Hai (hawapo pichani) namna ya kuiboresha sekta ya mifugo wilayani humo




Baadhi ya viongozi wa Wilaya ya Hai, wakiongozwa na Mkuu wa Wilaya ya Hai Bw. Lengai Ole Sabaya wakiwasilisha hoja mbalimbali kwa Naibu Waziri wa Mifugo na Uvuvi Mhe. Abdallah Ulega


WANANCHI WAONYWA KUTOTUMIA VIBAYA MATAMKO YA RAIS WA NCHI, KUKWEPA KODI



Katibu Mkuu Wizara ya Mifugo na Uvuvi anayeshughulikia Mifugo Prof. Elisante Ole Gabriel amewataka wananchi hususan wafugaji kutotumia matamko ya Rais wa Jamhuri ya Muungano wa Tanzania Dkt. John Magufuli vibaya kwa kutafuta mianya ya kutolipa kodi.

Prof. Gabriel amebainisha hayo akiwa katika mnada wa upili wa Meserani uliopo wilaya ya Monduli Mkoani Arusha mara baada ya kufanya ziara ya kukagua utendaji kazi wa watumishi waliopo katika mnada huo na kusikiliza kero za wafugaji.

Akizungumza na wananchi mara baada ya kufanya ziara hiyo Prof. Gabriel amesema Wizara ya Mifugo na Uvuvi katika kipindi cha mwezi mmoja itashirikiana na uongozi wa Halmashauri ya Wilaya ya Monduli kutoa tafsiri sahihi ya mfanyabiashara mdogo anayestahili kukatiwa kitambulisho cha biashara ndogo ndogo (machinga) cha Shilingi Elfu Ishirini kwa mwaka, kilichotolewa na Rais Magufuli kutokana baadhi ya wafugaji kutaka kufahamu endapo wanastahili kupatiwa vitambulisho.

“Mheshimiwa rais alikuwa amelenga hasa wale wafanyabiashara wadogo wadogo na tunachoamini tutaendelea kulifanyia kazi lakini suala la machinga kwamba naye mfanyabiashara wa ng’ombe kuhusishwa katika sifa za mfanyabiashara ndogondogo bado ni gumu kulitolea majibu, lakini ushauri tusitumie matamko ya rais vibaya tusitafute kichaka cha kujificha kwamba nawe ni machinga, wewe mwenyewe fikiria na jitafakari tulipe kodi na tujenge nchi yetu.” Alisema Prof. Gabriel

Akizungumza na wafugaji hao Prof. Gabriel amepokea kilio cha wafugaji kuwa wamekuwa wakiuza ng’ombe kwa makadirio au matakwa ya mnunuzi kutokana na kutokuwepo kwa mizani ili waweze kuuza ng’ombe kwa kilo badala ya bei ya kukadiria kati ya mfugaji na mnunuzi wa ng’ombe, kitendo ambacho wafugaji hao wamesema kimekuwa kikiwafanya wasiuze mifugo yao kwa bei yenye tija kwao.

“Lengo letu ni kuhakikisha minada yote hasa ya upili na ile ya mipakani inatumia mizani, mnada wa Kimesera mzani wake uko tayari unatakiwa kufanyiwa marekebisho ili kuondokana na bei ya kukisia katika kipindi cha mwezi mmoja.” Alisema Prof. Gabriel

Aidha katibu mkuu huyo, amewataka wafugaji kufuga kisasa kwa kuhakikisha wanawapatia ng’ombe malisho bora ili wapate mazao bora ya mifugo yao huku Wizara ya Mifugo na Uvuvi ikihakikisha inaendelea kuimarisha matibabu ili mifugo iwe na afya bora.

Katibu Mkuu Wizara ya Mifugo na Uvuvi anayeshughulikia Mifugo Prof. Elisante Ole Gabriel amesema pia licha ya uwepo wa masoko ya mifugo hususan ng’ombe hapa nchini, wizara inajikita katika kutafuta masoko ya mifugo nje ya nchi.

“Tunachoangalia hivi sasa ni kuangalia na masoko ya nje ya nchi lakini hauwezi kuuza ng’ombe nje ya nchi ambaye hana afya bora na tunaamini tukiendelea hivi hata mchango wetu wa wizara kwenye uchumi wa viwanda utakuwa ni mzuri.” Alisema Prof. Gabriel

Naye Bw. Kandidi Mlinyi ambaye ni msimamizi wa mnada wa Meserani amesema kuwa wamekuwa wakikumbwa na changamoto ya upatikanaji wa maji katika ukanda wa Wilaya ya Monduli hivyo kuwa na mazingira magumu ya upatikanaji wa huduma hiyo mnadani.

Kauli hiyo imeungwa mkono na baadhi ya wafugaji ambao wamesema ng’ombe wanaposafirishwa kutoka maeneo mbalimbali kuja katika mnada huo, kwa wastani wanakunywa maji lita 20 hadi 60 lakini kutokana na ukosefu wa maji ng’ombe wanakuwa katika mazingira magumu hali inayosababisha ng’ombe hao kuchoka kwa kuwa wanapoteza maji mengi mwilini.

Katika ziara hiyo ya Katibu Mkuu Prof. Gabriel wafugaji wamepongeza utendaji kazi wa Wizara ya Mifugo na Uvuvi kwa kuwa viongozi na watendaji wa wizara wamekuwa wakifika mara kwa mara kwa wananchi wakiwemo wafugaji ili kutatua kero zao.

Kwa mujibu wa taarifa kutoka katika uongozi wa mnada wa Meserani kwa siku zaidi ya ng’ombe 500 huuzwa na kusafirishwa kwenda katika mikoa mbalimbali wakati wa msimu ambao unakuwa na ng’ombe wengi kuanzia mwezi Machi hadi Julai kila mwaka.



Katibu Mkuu Wizara ya Mifugo na Uvuvi (Mifugo) Prof. Elisante Ole Gariel akikagua ubora wa baadhi ya ng'ombe waliofikishwa katika mnada wa Meserani


 

YALIYOJIRI KATIKA MKUTANO WA KUJADILI AFYA YA WANYAMA DUNIANI ULIOFANYIKA MJINI HAMMAMET, TUNISIA.



Naibu Waziri wa Mifugo na Uvuvi Mhe. Abdallah Hamis Ulega (MB) amehudhuria Mkutano Mkuu wa 23 wa Shirika la Afya ya Wanyama Duniani (OIE) Kamisheni ya Afrika, uliofanyika Mjini Hammament nchini Tunisia.

Mkutano huo uliojumuisha nchi zaidi ya 25 za bara la Afrika zikiwemo Zambia, Zimbabwe, Misri, Kenya, Uganda, Tunisia na Chad ulikuwa na malengo ya kuangalia afya ya wanyama, haki za wanyama, uzalishaji wa mifugo na usalama wa chakula kitokanacho na mifugo na kutoa mapendekezo kulingana na kanuni za shirika hilo duniani.

Naibu Waziri wa Mifugo na Uvuvi Mhe. Abdallah Hamis Ulega (MB) akiambatana na Mkurugenzi wa Huduma za Mifugo wa wizara hiyo Dkt. Hezron Nonga amepata fursa ya kufanya kikao cha ana kwa ana na uongozi mkuu wa Shirika hilo la Afya ya Wanyama Duniani (OIE) kwa kuzungumza na rais wa shirika hilo Dkt. Mark Schipp, Mkurugenzi Mkuu Dkt. Monique Eloit na mwakilishi wa shirika hilo kwa Ukanda wa Nchi za Kusini mwa Afrika Dkt. Samuel Wakusama.

Katika mazungumzo hayo, Mhe. Ulega ameshukuru uongozi huo kwa ushirikiano wake na Tanzania kwa kuendelea kuisaidia nchi katika miradi mbalimbali ya kulinda afya za wanyama hapa nchini.

Aidha ameelezea nafasi ya Tanzania katika rasilimali za asili ikiwemo mifugo na uvuvi ambapo kwa upande wa mifugo ametoa takwimu za mifugo iliyopo nchini pamoja na vikwazo ambavyo sekta ya mifugo inakabiliana navyo yakiwemo magonjwa, kasi ndogo ya mifugo kuzaliana (Poor Breeding) na uzalishaji duni (Low Productivity) hali ambayo inasababisha nchi kushindwa kusafirisha mifugo na mazao yatokanayo na mifugo kama vile nyama kwenda katika masoko ya nje ya nchi.

Mhe. Naibu Waziri Ulega ameliomba Shirika la Afya ya Wanyama Duniani (OIE) kuisaidia nchi ya Tanzania katika kukabiliana na changamoto hizo ili kukuza uchumi na kipato cha wadau wa sekta ya mifugo ambapo kwa pamoja uongozi huo umeahidi kuzifanyia kazi.

Licha ya mazungumzo hayo, Mhe. Naibu Waziri wa Mifugo na Uvuvi Abdallah Hamis Ulega (MB) kupitia kwa Mkurugenzi wa Huduma za Mifugo Dkt. Hezron Nonga, amewakabidhi andiko linalofafanua kwa kina sekta ya uvuvi nchini, changamoto zake na maeneo yenye uhitaji ili kuuwezesha uongozi huo kuendelea katika hatua ya utekelezaji.

Pamoja na mambo mengine, Mheshimiwa Naibu Waziri Ulega ameueleza uongozi wa OIE kuhusu nia ya Tanzania kuandaa mkutano ujao kwa kuwa ni nchi yenye mifugo na wanyamapori wengi, mazingira mazuri ya uwezekaji na taasisi maalum zinazoshughulikia masuala ya viwango, ubora wa bidhaa na usalama wa chakula.

Katika kutathmini afya za wanyama, wataalamu wamejadili magonjwa mbalimbali ya wanyama yaliyopo katika bara la Afrika hususan kwa nchi wanachama, athari na namna yakuyakabili yakiwemo magonjwa ya miguu na midomo (FMD), Kichaa cha mbwa na homa ya Bonde la Ufa (RVF).

Aidha kikao kimetathmini kwa pamoja miradi mbalimbali yenye lengo la kuimarisha afya za wanyama pamoja na michango ya wahisani ikiwemo Benki ya Dunia, Mchango wa Wataalam wa Kati wa Mifugo (Veterinary Paraprofessionals) na nafasi yao katika kuimarisha huduma za afya ya wanyama katika Bara la Afrika.


Kikao cha ana kwa ana kati ya Naibu Waziri wa Mifugo na Uvuvi Mhe. Abdallah Hamis Ulega (MB) (wa pili kutoka kulia) na Uongozi wa Shirika la Afya ya Wanyama Duniani (OIE). Kutoka kushoto: Mwakilishi wa OIE Kanda ya Kusini mwa Afrika Dkt. Samuel Wakusama, Rais wa OIE na Kamisheni ya Australia Dkt. Mark Schipp na Mkurugenzi Mkuu wa OIE Dkt. Monique Eloit na Mkurugezi wa Huduma za Mifugo wa Wizara ya Mifugo na Uvuvi (wa kwanza kulia) Dkt. Hezron Nonga.



MAKUBALIANO KATI YA SERIKALI NA BILL AND MELINDA GATES YATAKIWA KUTEKELEZWA




Naibu Waziri wa Mifugo na Uvuvi Mhe. Abdallah Ulega amemuagiza Katibu Mkuu Wizara ya Mifugo na Uvuvi anayeshughulikia Mifugo Prof. Elisante Ole Gabriel kufanya ufuatiliaji wa karibu kuhakikisha mikakati ambayo serikali imekubaliana na Taasisi ya Bill and Melinda Gates katika sekta ya mifugo inatekelezwa kama walivyokubaliana.

Naibu Waziri Ulega amesema hayo ofisni kwake jijini Dodoma alipotembelewa na ujumbe kutoka Taasisi ya Bill and Melinda Gates katika ofisi za wizara hiyo na kubainisha kuwa serikali inahakikikisha Mpango Mkakati wa Maendeleo ya Mifugo Tanzania unatekelezwa na kuishukuru taasisi hiyo kwa kutoa mchango mkubwa katika mpango huo.

“Sisi tuko pamoja na nyinyi na tunathamini makubaliano yetu na hatuwezi kuvunja makubaliano yetu ninawahakikishia kuwa nitamuagiza katibu mkuu afanye ufuatiliaji wa karibu sana kuhakikisha kwamba sisi tuna mikakati yetu tunayoifanya  lakini hii mikakati yote inaenda sambamba na kile tulichokubaliana.” Alisema Mhe. Ulega

Naibu Waziri Ulega pia amesema serikali kupitia Wizara ya Mifugo na Uvuvi imekuwa ikifanya ufuatiliaji wa karibu katika sekta za mifugo na uvuvi kwa kulinda rasilimali za nchi kwa kutumia Operesheni Nzagamba na Operesheni Sangara ili kuondoa mambo yaliyokuwa yakifanywa bila utaratibu na kuisababishia serikali hasara.

“Tunafanya ulinzi wa rasilimali na kuondoa ule uholela na kuhakikisha kuwa zile sheria, taratibu na kanuni zinafuatwa sana kwa sababu hata masoko ya kimataifa yalitaka uholela usiwepo, mambo yawe katika utaratibu wa kisheria na kanuni zinazoongoza sekta.” Alisema Mhe. Ulega

Aidha Mhe. Ulega amesema Wizara ya Mifugo na Uvuvi, inahakikisha katika operesheni hizo sheria, kanuni na taratibu za sekta za mifugo na uvuvi zinafuatwa ili sekta hizo ziweze kusonga mbele kwa kumuwekea mazingira mazuri mwananchi ili aweze kufaidika na nchi iweze kuongeza pato la taifa.
Akizungumza katika kikao hicho ambacho kimehudhuriwa pia na wakuu wa idara kutoka Wizara ya Mifugo na Uvuvi, Katibu Mkuu Wizara ya Mifugo na Uvuvi anayeshughulikia Mifugo Prof. Elisante Ole Gabriel amebainisha baadhi ya mambo ambayo yanapaswa kusimamiwa ikiwemo elimu ili wafugaji waweze kunufaika kupitia sekta hiyo.

“Ningependa katika ushirikiano wetu huu tuzidi kushirikiana katika kutoa elimu kwa wafugaji wetu tuwe na ufugaji wenye tija, lakini eneo lingine la pili ni usimamizi dhidi ya magonjwa, la tatu ni kuwawezesha wafugaji wetu kiuchumi lakini la nne ni utekelezaji wa Mpango Mkakati wa Maendeleo ya Mifugo Tanzania.” Alisema Prof. Gabriel

Prof. Gabriel pia ameainisha mambo mengine kuwa ni umuhimu wa kufanyika kwa tafiti, usimamizi na uhakikishaji wa uzalishaji bora wa mifugo ili sekta ya mifugo iweze kuwa na maendeleo endelevu.

Akizungumza kwa niaba ya Afisa Programu Mwandamizi wa Taasisi ya Bill and Melinda Gates katika Ukanda wa Afrika ya Mashariki Bibi Mercy Karanja, Mshauri Mwelekezi kutoka taasisi hiyo nchini Tanzania Prof. Marcellina Chijoriga amesema Taasisi ya Bill and Melinda Gates bado itaendelea kufanya kazi nchini kwa kufuata mpango wa serikali.

Aidha Prof. Chijoriga ameshukuru uongozi wa Wizara ya Mifugo na Uvuvi ambao umekuwa ukitoa ushirikiano mkubwa kwa taasisi hiyo na kutoa ombi kwa uongozi wa wizara kuendelea kushirikiana na Taasisi ya Bill and Melinda Gates ili iweze kuleta matokeo chanya kwa wafugaji nchini.



Naibu Waziri wa Mifugo na Uvuvi Mhe. Abdallah Ulega akiwa kwenye picha ya pamoja na maafisa kutoka Taasisi ya Bill and Melinda, Mercy Karanja (kulia) na Mshauri Mwelekezi wa taasisi hiyo Prof. Marcellina Chijoriga